Bou di invitacion di Departamento di Recurso Humano cu ta resorta bou di Ministerio di Prome Minister Evelyn Wever-Croes, diabierna atardi e mandatario a bishita e departamento aki pa celebra hunto cu e dienst aki nan celebracion di clausura di aña. Tabatin un ambiente hopi ameno pafo di nan establecimento unda cu por a nota alegria y satisfaccion di un aña exitoso den e cara di e empleadonan.
Den un descurso cortico, Prome Minister a elogia e departamento bisando cu DRH ta un departamento hopi crucial y ta considera DRH e curason di e aparato gubernamental. Prome Minister a reconoce cu e ta na haltura cu DRH tabatin no solamente un aña pisa pero tambe e ultimo dianan aki tabata un presion grandi cu e empleadonan a pasa aden. Cu hopi trabou cu ainda no a caba. Pero e manera cu DRH a traha a mustra un profesionalismo enorme.
Prome Minister a termina su discurso deseando tur presente feliz dianan di fiesta benidero y pa DRH e la desea tur exito pa e proximo aña.
Na su turno, Director di DRH Omaira Lares a desea Prome Minister exito den e reto nobo su dilanti y a afirma e mandatario cu e y su ekipo lo sigui traha cu animo pa duna gobierno y pueblo di Aruba semper un bon servicio.