ORANJESTAD, Aruba – Riba un 13 di december, pero 50 aña pasa, Walter Theysen, e tempo ey un hoben di apenas 18 aña di edad, a wordo acerca pa su ruman mayor Emmy, “Busca camisa blanco y carson preto pa bo cuminsa traha awe nochi”. Kiermen pa Walter cuminsa traha na casino di Aruba Caribbean Hotel, e mesun anochi ey!
Tabata December di 1967, fiestanan di fin di aña tabata acercando. “Kico awor, net awor??” tabata e pensamento y expresion inocente di e hoben sin ningun experencia di trabou, ademas di scol, el a tuma curso adicional di Ingles y electricien pa asina despues cuminsa busca un trabou! Cu hopi nervio y un poco di miedo, pero semper realisando cu ta un bon chens pa traha y gana algo pa yuda su mama Fabia cu gastonan den cas. Cu aliento y sosten di su mama e tabatin speransa cu toch tur cos lo bay bon. Den cuminsamento na e casino el a traha como waiter y tambe bartender, combina cu les y practica pa un dia bira ‘experienced dealer’.
Un cos cu Walter nunca ta lubida, ta cu su mama semper a percura pa tur dia e tabatin un camisa limpi, cu manga y cueyo guma pa asina bay traha. Cu e prome salario cu el a cobra e ta corda bon cu su mama a cumpra 11 camisa blanco mas di marca Arrow na La Linda, pa asina e ta semper bon presenta na trabou!
Despues di dos aña, e mesun operador di casino di Caribbean hotel, lo a bay habri un casino na e hotel nobo, Holiday Inn, na banda panort di Palm Beach. Nan a yama Walter y a ofrece pa cuminsa traha na e casino ey como ‘experienced dealer’! Den e añanan na Holiday Inn, for di 1969 te cu 1977, el a traha como dealer.
Den un ocasion cu gerencia di casino tabata kier a duna oportunidad na dealernan pa haya promocion pa supervisor, un grupo di trahadonan a acerca y a puntra e manager pakico no a considera Walter, e mucha homber serio, calmo y modesto, pa un oportunidad pa bira supervisor? A pesar cu Walter su mes nunca a puntra p’esey, di cual e manager a declara cu Walter ta mucho chikito pa por controla e otro trahadonan y tambe clientenan, den e ambiente bastante agresivo y duro di casino di e tempo ey! E manager, un persona hopi respeta, a pensa ‘lo miho’ pa Walter, e tabata referiendo na e postura di dje. E acto ey a resulta, di un of otro manera, positivo toch! T’asina cu Walter a logra gana e prome premio di ’empleado di aña’ otorga pa Holiday Inn Aruba, e periodo ey sin duda a duna e hoben un experencia grandi den e trabou di casino.
Walter su tempo lo yega toch. Na 1977, e operador di casino McCarly a acerca Walter, y a bis’e cu nan lo bay opera un casino den un hotel nobo cu lo bay habri, e hotel mas grandi riba e isla den e tempo ey, Aruba Concorde Hotel. E miho noticia ainda tabata cu Walter a wordo pidi pa cuminsa eynan, no como dealer pero como supervisor! Den e añanan ey di hopi trabou duro pero tambe fructifero na Concorde Casino, Walter a haya promocion for di ‘supervisor’ pa ‘pit-boss’ y despues hasta pa ‘shift-manager’.
Un anochi memey den aña 1989, un meneer cu no tabata conoci personalmente pa Walter, a aserk’e den e casino na Concorde. El a introduci su mes como Eduardo de Veer y a puntra Walter si e lo ta interesa pa reuni cu ne pa papia. E idea di meneer de Veer lo tabata pa habri un casino nobo cu lo bay wordo establece na unda tabata De Veer Theater, den pleno stad, algo sin precedente! Walter a acepta e reto nobo pa traha pa meneer de Veer den e casino di Sonesta hotel, como ‘Assistant Casino Manager’, reportando na Lester Bullock cu lo a bay fungi como e ‘Casino Manager’.
Na final di e prome 6 lunanan for di apertura di e casino ya tabatin sorpresa grandi, Lester a laga e puesto di ‘Casino Manager’! Eynan meneer de Veer a puntra Walter pa tuma encargo di e casino, un responsabilidad enorme! El a responde bisando Meneer de Veer cu honestamente e no ta kere cu e ta cla ainda pa dicho responsabilidad. Meneer de Veer a bise, “ban purba! Despues di tres luna nos lo wak con ta bayendo y lo papia atrobe”. Pero, manera Walter mes ta conta, “E berdad ta cu tres luna a pasa y nunca mas mester a papia atrobe tocante e situacion ey, al contrario, mi tabata oficialmente e ‘Casino Manager’ y a hasta despues haya e titulo di ‘Vice President of Casino Operations’ , tempo cu e compania a tuma e casino na Harbourtown tambe over”. A pesar cu na su opinion, e titulo tabata mucho grandi p’e, el a pidi pa un otro titulo mas simpel, asina ta cu el a keda cu e titulo di ‘Casino General Manager’ te cu dia cu el a alcansa edad di pensioen, pa despues bira ‘Casino Consultant’ te cu e dia di awe.
Den e añanan desde e encuentro cu Eduardo de Veer den casino di Concorde na 1989 te cu awor, Walter a logra haci trabou hopi mas grandi cu locual e por a pensa y soña na 1967, e confiansa y sosten cu el a haya eventualmente di e ‘team’ di MetaCorp, di Eduardo de Veer, tabata indispensabel pa asina yega na e cumbre di exito di su carera. Pa hopi tempo localnan tabata yega na e titulo di ‘Casino Manager’, pero no necesariamente cu ful responsabilidad, semper toch reportando na un stranhero cu tabata encarga cu e tareanan mas importante, nan tabata reporta na un hefe of doño cu no tabata yiu di tera! Cu MetaCorp esey a cambia y Walter tabatin e oportunidad di por a maneha tur aspectonan di e operacion di casino, for di ‘hands on management’ te cu trahamento di presupuesto anual, e experencia a inclui tambe habrimento y operacion di casino na Renaissance Hotel di Corsou entre otro.
Remarcabel ta cu Walter Theysen en berdad nunca a hay’e ta aplica pa ningun puesto di trabou, semper, den tur e cincuenta añanan, el a wordo acerca y a asina a haya ofertanan di trabou nobo! Un testament di su ser modesto, un persona serio y prepara, cu semper a sa di observa y siña mas hopi posibel, bon presenta, cu balornan humano pa haci locual ta bon y corecto, semper cu hopi pasenshi.
Desde un principio el a haya sosten grandi di su mama Fabia, pa ken e tin hopi aprecio y gratitud, Fabia a siñe tambe pa traha duro cu dedicacion, humildad y pa ta semper respetuoso. E ta gradici MetaCorp, Eduardo de Veer, pa su enseñansa y confiansa pa por a yega na cosecha hopi exito cu e ‘casino local’! Un danki na tur colega y ex coleganan cu a yega di traha cu ne, specialmente Dady Roos pa su lealtad y defunto Ruben Schwengle pa su confiansa. Finalmente, un gratitud cu hopi aprecio tambe na su famia, su yiunan, pa kendenan el a dedica su carera pero tambe a sacrifica hopi di nan tempo hunto, hasta trahando leu for di nan pa un par di aña.
Segun Walter, “Hopi cos a pasa den e ultimo 50 añanan, hopi di nan tabata lesnan pa nos como profesional y alabes como ser humano, tabatin hopi logro pero fayonan tambe, a siña di eseynan p’asina mehora. Awendia nos por sigui dilanti cu satisfaccion, sabiendo cu a haci e trabou y di bon manera, awor tambe cu hopi mas aprecio pa cu nos bida.