ORANJESTAD, Aruba- Despues di awacero semper Gele Koorts en Muskieten Bestrijding (GKMB) ta ricibi yamadanan for di comunidad pa cu molester di sangura den nan vecindario. E luna di December ta un luna conoci pa e seccion di servicio aki, cu ta resorta bow di Directie Volksgezondheid, unda tin un demanda halto pa asistencia di GKMB. E aña aki no ta un excepcion.
For di algun dia caba yamadanan a cuminsa drenta na GKMB pa asina ricibi e asistencia necesario pa e molester di sangura cu personanan ta keda confronta cune. Na momento cu GKMB ricibi un di e yamadanan aki, mesora ta sali pa inspectiona e area indica y asina despues si resulta cu enberdad tin un molester di sangura GKMB ta bay fuminga.
GKMB ta avisa pueblo di Aruba cu desde diamars 12 di December 2017, lo haci esaki tambe den forma preventivo pa asina alivia e molester di sangura durante e temporada di December. E fumigacion cu lo tuma lugar no ta solamente pa e sangura Aedes Aegypti cu ta conoci pa por transimiti e.o. zika, dengue of chikungunya, pero ta pa tur sangura cu ta causando molester den nos comunidad. E fumigacion lo cuminsa y segun demanda di pueblo lo sigui pa tur bario yega na turno.
Ta pidi tur ciudadano pa porfabor tira un bista rond di cas y si tin cualkier tipo di molester of pregunta por tuma contacto libremente cu GKMB via Directie Volksgezondheid na 5224200. Tambe ta haci un suplica na tur esnan cu ricibi bishita di GKMB pa porfabor sigui recomendacion di e inspector pa asina hunto por caba cu cualkier molester y criadero di sangura.