Home Politics Ley di iniciativa: Meta ta pa percura pa oragnisacionnan por funciona optimalmente...

Ley di iniciativa: Meta ta pa percura pa oragnisacionnan por funciona optimalmente pa asina abuso por wordo miho señala, preveni y atende cu ne

SHARE

Manera ta conoci Aruba a wordo sacudi pa un tragedia enorme caminda dos criatura inocente a perde nan bida a consecuencia di abuso. Pa Fraccion di MEP esaki tawata un empuhe, pa mas aun ainda, percura pa aspecto nan social haya e debido atencion y tambe percura pa ancra cierto aspectonan den ley pa garantisa cu abuso mester wordo gemeld, pa organisacionnan tin autoridad y recurso pa por actua, pa asina derecho di victimanan di abuso wordo protehi.

Situacion actual
Aruba conoce un departamento cu ta fungi como centro pa conseho y coordinacion den caso di abuso y maltrato contra menor, esta Bureau Sostenemi. Sinembargo e existencia di e departamento aki no ta ancra den ley. Na aña 2015 Parlamento di Aruba, a base di un mocion, a urgi e Minister di Asuntonan Social y e Minister di Husticia di e tempo ey, pa conhuntamente percura pa Bureau Sostenemi wordo reenforsa, amplia y ancra den ley.

Reglamentacion pa ley di un “advies- en meldpunt kindermishandeling” ta parti di e “burgerlijk wetboek” nobo, specificamente articulo 243 ta trata esaki. Sinembargo e “burgerlijk wetboek” ta ensera mucho mas cambionan y pa e motibo ey entre otro e “burgerlijk wetboek” no a wordo trata mas. Fraccion di MEP ta di opinion cu esaki no mag stroba e hecho pa ancra un organisacion manera Bureau Sostenemi den ley caminda ta amplia nan tarea y ekipa nan na mes momento tambe cu suficiente personal y material pa por fungi manera debe ser.

Plan di Fraccion di MEP
Fraccion di MEP tawata tin diferente reunion caba cu stakeholders riba e tereno aki pa asina por yega na un ley di iniciativa cu ta percura pa oragnisacionnan por funciona optimalmente pa asina abuso por wordo miho señala, preveni, atende cu ne y pa meldingnan cu wordo haci por wordo miho coordina.
E team di MEP hunto lo percura pa riba un tempo relativamente corto sinta cu tur stakeholders pa asina haña un bon “overview” di tur departamento y for di tur angulo.
Den cuadro di esaki tambe a reuni caba cu “Directie Wetgeving en Juridische Zaken”, pa asina wak diferente posibilidad pa introduci e base legal pa por atende cu e problematica aki. Por ehempel por opta kisas pa trata introduccion di articulo 243 di e “burgerlijk wetboek” nobo separa.

E meta principal ta pa yega na un departamento cu ta bon ekipa cu material y personal specialisa riba tur aspecto y ancra esaki den ley.
E departamento aki lo (1) monitoria e cadena y señala ora algo por bay robes, (2) fungi como instancia cu tin un “overview” di tur caso y asina atrabes di un sistema automatisa sigui e casonan pa garantisa bienestar di victimanan, (3) fungi como e meldpunt (pa ley) y (4) percura pa e asina yama “feitenonderzoek” sosode mes ora na momento cu e melding drenta.

Na mes momento ta e idea tambe pa reglamenta pa ley cu personanan y of instancianan cu tuma nota di abuso mester meld esaki. Dimes e parti aki lo mester wordo bon defini pa ley y na mes momento wak ki posibilidadnan tin pa garantisa cierto anonimidad.
Henter Fraccion di MEP conhuntamente cu Gobierno lo traha como team riba e aspectonan menciona pa asina riba un tempo relativamente cortico por trece e cambionan cu e diferente departamentonan y nos comunidad ta boga p’e.