Home Local Ericson Maduro a gana “Slim to Win” perdiendo 28 kilo

Ericson Maduro a gana “Slim to Win” perdiendo 28 kilo

SHARE

Aruba Marriott Resort & Stellaris Casino cu iniciativa saludabel pa su empleadonan

El a gana un aña di “Groceries Shopping” gratis y estadia di 4 anochi den hotel

ORANJESTAD, Aruba – E “challenge” Slim to Win di Aruba Marriott Resort & Stellaris Casino a termina y dia 4 di December 2017 a saca e ganado, den persona di Ericson Maduro cu a baha no menos di 28 kilo durante e 6 lunanan di ehercisio, comemento y biba saludabel.

E participantenan tabata Ericson Maduro, May-Ruby (Annie) Kock, Naomi Chayadi, Terry Florez-Davis y Prenia (Lala) Pierre. Pa 6 luna largo e participantenan a haya training guia y les di cushinamento pa asina nan ta mas saludabel. E participantenan a ricibi training for di Rodney Pieternella y Aura Garcia di 2BFIT Studio, como tambe ayudo psicologico di Judeska Briceño kende tabata scucha nan y tambe nutricionista Johanna Stroo tabata guia nan pa come mas saludabel. Na momento cu a saca e ganado, tur participante tabata nervioso y na final e ganado tabata Ericson Maduro.

Tur esunnan presente a haya oportunidad di scucha storia di cada participante unda e emocionnan tabata halto. Naomi Chayadi tabata contento di e oportunidad aki y cu awa na wowo el a subi scenario pa conta su storia, unda cu el a busca manera pa baha y no tabata logra esaki riba su mes y awo cu e reto aki el a bin baha peso. Lala Pierre a bisa cu pa su salud y pa su rudia e mester a haci e cambio aki y a gradici Marriott p’e oportunidad duna. Ericson Maduro a expresa cu e tabata sufri di hopi dolor na su pecho y tawata a punto di haya un ataca di curason door di su peso y dokter tabata conseh’e tur ora pa baha peso. Mary-Rubi Kock tambe a conta su storia y ta contento pe cambio aki. Awo e ta enfoca pa sigui tin un bida saludabel. E “challenge” aki pa Terry Flores-Davis tabata un cambio positivo den su bida saludabel y e kier sigui riba e caminda aki.

Ruthline Theysen, complex director di Recursonan Humano a indica cu pa 6 luna largo 5 empleado tabatin e reto pa perde peso y biba un bida mas saludabel. E participantenan a baha un peso total di 76.1 kilo como grupo y e ganado di e reto tabata Ericson Maduro, kende a perde 28 kilo di cual 7.4 tabata “body fat”. Ericson Maduro por haci compra na Ling & Sons pa 1 aña gratis y “4 nights stay” na cualkier hotel di e famia Marriott na Aruba. Terry Florez-Davis a keda na di dos luga unda cu el a perde un total di 16.1 kilo y 2.3 di body vet, tambe por haci compra na Ling & Sons pa 1 aña y “2 nights stay”.

Marriott Internacional tin un “take care program” y 2 aña pasa Aruba Marriott Resort & Casino a cuminsa cu e “take care initiative”. Tur luna nan tin un actividad fisico sea ta canamento, functional training, Zumba, yoga y e ta gratis p’e empleadonan. El a sigui splica cu ta pone esakinan den orario di atardi pa 1 ora y cualkier persona cu ta traha na e resort por participa. Tambe nan a traha un menu saludabel, un estilo di bida saludabel den e cafetaria. Tur trahado tin e opcion di come saludabel den e cafetaria, a crea menunan di cual a pone acerca nutricion valioso di cual Johanna Stroo a yuda nan cu esaki. Asina aki e empleadonan por mira kico nan ta bay come y e cuanto e caloria ta.

Aruba Marriott Resort & Casino ta haci hopi seminario cu ta yuda nan salud mental, con pa handle stress, con pa handle situacion financiero, el a expresa. Nan a yega di haci lezing con pa cushina, kico ta saludabel, ora di bay supermercado kico mester scoge.

E programa “Slim to Win” ta un iniciativa di Marriott mes y nan ta cay bou e “healty hotel certification”, cual aña pasa nan a ricibi e nivel di oro den nan rango di color y e aña aki nan ta bayendo p’e nivel platino. “Un di e cosnan cu nos no ta haci aki mas den nos cafetaria ta deep fried food”, Ruthline Theysen a expresa.

Nan ta percura pa tin cumindanan cu sodium abou, tur dia tin fruta disponibel, salad bar, opcion vegetariano. E ta comproba cu ora di cuida bo empleadonan di un manera saludabel, nan productividad ta subi na trabou, e porcentahe di AO a baha y eficiencia, e positivismo cu ta hinca den e trahadonan di Marriott ta subi. Aunke no ta scoge tur hende den e reto di “Slim to Win” cu ta un programa di 6 luna, tur otro hende rond di nan y nan famia tambe ta scoge pa un bida saludabel. Hopi hende di e hotel tambe a baha peso, asina el a termina bisando.

Marriott Resort a habri na Aruba na aña 1995 cu 411 camber. Na aña 1999 a habri Ocean Surf Club cu 311 camber y na aña 2004 a habri Surf Club cu 900 camber. Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.