Minister Glenbert Croes a cumpli su prome 10 dianan ocupando e Ministerio di Asuntonan Social y Labor. Un Ministerio controversial pa motibonan ya conoci, pero tambe pa motibonan di negligencia formal. Un Ministerio cu algun a considera “pretpakket” te ora cu nos problemanan social a bin na superficie despues di a explota den nos cara como pueblo y como pais cu e mortonan lamentabel, tristo y cruel di Rishandro y Eugene.
Tabata 10 dianan sumamente intensivo cu mas bien ta sinti como 10 siman yena di sucesonan. Pero tambe ta 10 dianan di decisionnan sumamente importante. Su prome decision tabata di pone un paro na tur ontheffing. Su di dos participacion na Pueblo di Aruba tabata di a informa DAO y DPL cu su maneho ta: Trahadornan Local prome. Contratistanan Local prome. Na mes momento a elimina e Citgo Desk bieu y a institui un DPL Oil & Gas Industry Desk cu lo conta pa Citgo y Repsol pa sigura cu trahadornan local y contratistanan local ta haya preferencia na tur momento. Den su reunionnan cu Asuntonan Social a keda dicidi di lo bay tuma pasonan firme pa cuminsa cu e rescate, cu no por warda mas. Den un presentacion di DAS na San Nicolas, Minister a expresa di tin e compromiso tambe pa sigura cu nos grandinan por tin un cuido digno. Despues a surgi e suceso cu a sacudi e fundeshi di nos nacion, cu a explota den nos cara, pone cada un realisa cu pa trece cambio nos mester cuminsa na e problema, Y mirando cu e problemanan ta di multiple indole cu esaki mester bira un esfuerso di nos tur, di Gobierno y nos Pueblo. E responsabilidad ta di tur hende. E boluntad t’ey y esaki ta habri e caminda pa yega na solucionnan concreto pa Pais Aruba.
Esaki ta e resumen cortico di mi prome 10 dianan agradecido na Pueblo di Aruba pa e confiansa y oportunidad. Boso a duna mi e confiansa. Boso Minister ami ta.