Parlamentario Endy Croes a habri e conferencia di prensa di fraccion di MEP, deseando hopi forsa na famianan di e acto tragico cu a tuma luga ultimo dianan cual desde diamars a keda conoci, momento cu e otro baby di 3 aña a wordo localisa, pero lamentablemente sin bida. Sigur ta algo hopi duro. Sin culpa ningun hende, nos sa cu e famianan ta pasando den momentonan hopi dificil, hopi doloroso y nos di parti di e fraccion di MEP, kier expresa na e dos angelitonan aki pa nan por sosega na paz y nan famia y henter e pueblo cu a wordo geshock. Pa e causa aki hopi forsa.
Prevencion di abuso
Laga nos tur hunto uni na e momentonan aki y di e manera aki nos por ta kisas e consuelo pa e dolor asina grandi cu e famianan ta pasando aden. Pueblo por ta sigur cu como parlamento y como gobierno, lo nos haci tur esfuerso di nos parti desde awor en adelante pa por cambia leynan necesario, duna toolsnan necesario na instancianan, pa asina por preveni y ring the bell na tempo, ora cu tin posibel casonan di interes. Claro e otro aspecto cu pueblo ta boga p’e, esta pa castigonan mucho mas pisa lo wordo canalisa adhunto. Sinembargo esey ya ta e parti despues cu algo a tuma lugar. Parlamento lo traha riba tur dos. Pero e parti primordial pa preveni, lo tin hopi mas atencion, segun Croes.
Melding
Nos tin entendi, cu berdad a haci melding. Si e melding ey no a cana su caminda corecto, cu e mucha tin tanto tempo sin bay scol y unda e comunicacion aki por a bay malo, investigacion lo determina. Tin compronde cu e mayor a busca caminda via Voogdijraad y a bay te abogado. Kier laga e investigacionnan tuma luga pa por tin cosnan mas concreto. No por ta asina, cu si haci melding y esaki ta tranca un caminda, of ta pa motibo di ley y toolsnan, cu directornan di cierto departamento no por actua of ta pa motibo di falta di personal cu e trabaonan necesario no por wordo haci y cu esaki a culmina den un acto tragico di un enbergadura asina grandi. Tur esaki, despues di investigacion lo por tin conclusionnan concreto pa por corigi unda mester wordo corigi. Dentro di poco parlamento lo yama un reunion cu e ministernan concerni y tambe director di e departamentonan, asina lo formula kico exactamente lo por a bay mihor. Nos mester percura pa algo asina no sosode hamas y ta nos deber como representante di pueblo pa duna nos contribucion pa drecha e cadena di informacion cu mester core di un departamento pa otro pa asina por actua cu forsa di ley ora ta necesario pa preveni y proteha nos muchanan. Pueblo a duna nos un oportunidad pa traha y representa pueblo y pues ta nos deber di actua y no faya nos pueblo