Relaciona cu e caso di e criatura cu a wordo maltrata severamente y a fayece.
Oranjestad – Dialuna merdia Minister Glenbert Croes hunto cu instancianan di Asunto Social a tene un conferencia di prensa, caminda tur representante a trece nan preocupacionnan dilanti.
Esnan presente tawata Sra. Hernandez, Directora di Departamento di Asuntonan Social, Sra. Teckelenborg di Buro Sostenemi, Sra. Berckemeyer, Directora di Voogdijraad, Sra. Arends, Directora di Stichting Casa Cuna y tambe e Voorzitter di Fundashon pa Muhenan den dificultad Sra Kock.
Tur e instancianan ta riba e mesun liña, cu ta falta hopi cos pa nan por funciona optimalmente, di finacieramente te na mankracht falta hopi. Tambe nan a duna di conoce cu e gobierno anterior tabata na altura di con serio e situacion ta y pa un of otro motibo no a duna e instancianan aki e debido atencion, esaki ta un hecho cu nan tur a reconoce.
Nan ta pidi cooperacion di e comunidad di Aruba y ta bisa cu ta hopi importante pa e comunidad ta alerto y bati alarma, si acaso señal cu abuso di mucha den cualke forma ta tumando lugar. Nan ta pidi pa No ban laga esaki ta keda na palabra so, pero na hechos.
Un criatura awe ta morto, door di maltrato fisicamente pisa, door di su mama y su padrastro.
E departamentonan cu a presenta awe ta pone hopi enfasis pa nos comunidad ta alerto pa cosnan cu ta pasa rond, e por ta cu un mucha of un adulto indefenso, mesora mester bati alarma. Tambe nan ta pidi pueblo cooperacion, hopi biaha ora nan ta organisa un congreso of cualke charla, e participacion di nos comunidad ta hopi pober.
Nos di arubanative.com por a nota esaki tambe na e marcha di silencio di Diadomingo ultimo, un causa noble di algun persona pa un caso asina serio, lo mester a haya hopi mas atencion, lo mester a spera un multitud grandi di hende presente, pero si tabata tin 100 hende lo tabata hopi, e pueblo no ta duna prioridad na abuso di mucha.
Segun e instancianan esaki ta pasobra nos comunidad ta ocupa cu hopi otro cos y no ta interesa den e congreso of charlanan di concientizacion di e instancianan aki. Nan kier pa e informacion yega na full e comunidad, pero hopi dificil pa nan logra esaki si e comunidad di Aruba mes no ta interesa.
Na final Minister Glenbert Croes encarga cu Asuntonan Social a gradici tur e representantenan di e departamentonan y instancianan, cu a trece nan testimonio dilanti manera e la yam’e y pa lanta e comunidad for di soño.
Minister Croes a yame e situacion actual, despues di a scucha e directoranan “Un Crisis Social Nacional”, cu ta exigi e maximo esfuerso di nos tur pa scapa e futuro di nos criaturanan y cu hamas algo di e magnitud aki por ripiti.
E gobierno aki sigur lo pone E ser humano central.