Home » Kiko a bay robes? un criatura morto y un desapareci, famia tin dos luna sin mire

Kiko a bay robes? un criatura morto y un desapareci, famia tin dos luna sin mire

by Admin
0 comment 91 views

San Nicolas: For di den siman por a cuminsa lesa riba Facebook, cu tin un mucha di 3 aña perdi y famia tabata comenta cu nan tin 2 luna sin mira e criatura, pero no por confirma cuanto tempo e ta perdi. Tambe a cuminsa pidi oracion pa e ruman cu tabata luchando pa su bida na hospital y cu diabierna den oranan di atardi a kit’e for di mashin y e pober a fayece, na golpinan fuerte cu e la ricibi di su mama y su padrastro. E mama y e padrastro a keda deteni pa autoridad como sospechoso di e abuso y morto di e criatura di 5 aña.

E tata y demas famia ta den hopi desesperacion paso nan kier sa paradero di e otro yiu di 3 aña, aparentemente e mama y ni e padrastro no lo kier bisa unda nan a hiba e yiu di 3 aña.

Diabierna atardi a haci un entrada hudicial na 4 adres na San Nicolas pa buska e criatura, pero sin resultado. Diasabra den oranan di merdia famia a cuminsa cu un buskeda rigoroso den San Nicolas pa wak si nan por haya e mucha.

Mientras tanto informacion nan ta drenta cu e caso aki tabata y ta conoci pa diferente instancianan. Nan tabata sa cu e muchanan aki tabata wordo neglisha y cu e famia aki ta un famia caminda tin varios problema caba. Aparentemente alarma a wordo bati varios biaha caba door di un of mas instancia.

E pregunta ta keda, Si tabata sa cu e muchanan ta wordo abusa, neglisha, maltrata etc. dicon no a actua mesora y saca e criaturanan for di e situacion cu nan tabata den, paso un of mas instancia por bati alarma, pero probablemente no lo tin autoridad pa actua of ta nos leynan, ta stroba pa actua liher den casonan asina?

 

Sigur eyfo lo por tin mas mama cu no kier of no ta capas pa mantene, cria of educa un yiu. Hopi biaha door cu nan mes ta muchanan cu a crece den un ambiente cu no ta sano, por ehempel caminda alcohol, droga, prostitucion, abuso etc. tabata hunga un rol den bida di nan mayornan y esaki sigur no ta un ambiente pa cria of educa un mucha, e mucha hopi biaha ora e crece den un ambiente cu no ta sano, e lo ta kere cu e cosnan aki ta parti normal di bida.

E criatura di 5 aña a bay sosega, pero esun di 3 aña unda e ta? Con un mama por hinka den su cabes pa maltrata of laga un otro persona maltrata su yiu te cu e ta fayece. Hopi biaha nos ta tende di casonan asina cu ta pasa den exterior, pero no por a pensa cu na Aruba tambe cerca di nos tin abusadornan asina.

Ban spera cu por haya e criatura di 3 aña aki y cu un persona cu ta stime tin’e y cu e tin un chens ainda. Ohala cu e caso tristo aki por sirbi como un les, pa cambia leynan y facilita instancianan pa actua mesora na momento cu nan ta mira cualkier tipo di abuso ta pasando cu un mucha.

Un hende eyfor mester por a mira algo of por sa paradero di e criatura di 3 aña, porfabor avisa polis mesora paso e tata y demas famia ta precupa y tin derecho di sa unda e mucha ta, ya ta dos luna cu nan no a mira e mucha.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio