Minister Glenbert Croes ta pone un paro na ‘ontheffing’ te proximo aviso

Minister di Asuntonan Social y Labor a tene su prome reunion awe cu Departamento di Progreso Laboral (DPL) despues di haci un bishita di cortesia y introduccion na e departamento aki.
Un reunion unda cu DPL a haci un presentacion di su funcionamento. Hopi punto importante a keda discuti y Minister di su banda a logra transmiti su vision y punto di salida unda cu trahadornan local tin tur prioridad. El a splica tambe cu pa su persona e palabra ‘local’ no solamente ta referi na esunnan naci na Aruba pero tambe na tur e personanan cu ta estableci na Aruba sea cu firma liber of varios permiso. Pa es motibo aki cu Minister a informa Directora di DPL cu te cu proximo aviso e ta pone un paro na tur ‘ontheffing’ te dia cu e haya un bista amplio y total di e situacion actual. Reunionnan ta continua den transcurso di e siman aki mes pa asina logra compila tur informacion necesario.