Fernando Lewis a cumpli 20 y Humphrey Francisco a celebra 30 aña di servicio
ORANJESTAD, Aruba – ATCO Concrete a celebra e añanan di servicio di dos empleado fiel na e compania. Humphrey Francisco a cumpli 30 aña di servicio, mientras Fernando Lewis a cumpli 20 aña. Den un ambiente entre coleganan y famia, a celebra e añanan di servicio unda cu tur hende a gosa, disfruta y baila.
Richard de Veer, Acting Managing Director di ATCO Concrete, tabata contento di por a celebra e añanan di servicio cu Fernando Lewis, kende ta un chauffeur di e compania. Hopi momentonan leuk el a pasa trahando cu Fernando Lewis, unda cu Richard de Veer a comparti esaki cu tur hende. “Fernando ta un bon chauffeur y semper nos por conta cun’e” asina Richard de Veer a expresa di e empleado. Den e ultimo 10 añanan el a nota un cambio drastico y a ripara cu Fernando Lewis a sali e ultimo 3 añanan di tin e truck mas limpi di e planta, cual el a elogia e empleado.
Robby Fingal a recorda cu Fernando Lewis a cuminsa traha cu nan dia 3 di Juli 1997 y a cuminsa den garashi, unda su trabou tabata ‘tire man’. Momento cu e tabata drecha taira, mester a saca e trucknan y otro ta drenta y aki el a cuminsa siña core trucknan di ATCO. Despues di esey Fernando Lewis a pidi un oportunidad pa core truck, pero el a cuminsa como un ayudante di truck den e planta di bloki. Asina aki el a keda bay dilanti y a logra su rijbewijs di truck, despues el a bira un chauffeur di un mixer y di un dumptruck pa entrega material. Ferando Lewis ta haci dos cos den e compania cual ta mantene su truck limpi y ta e chauffeur cu ta entrega mas concrete en 1 aña pa clientenan.
Fernando Lewis ta contento di ta den servicio den ATCO Concrete, cual ta un compania tremendo. El a gradici tur su hefenan y coleganan di trabou. Tambe na su famia cu a sostene. E ta spera t’ey pa hopi aña mas cu ATCO Concrete.
Richard de Veer ta corda su experiencia cu Humphrey Francisco, kende a bin na e “batch plant” na 2012 y aki tabatin un “excavator” para. E tempo ey nan tabata busca un operator pa traha cu excavator y e nomber di Humphrey Francisco a bin dilanti. Richard de Veer a laga Humphrey Francisco handle e excavator, kende ta percura p’e mantencion di e excavator y ta mantene esaki limpi. E ta un persona ehemplar pasobra e no ta core e excavator duro pero door cu e ta mantene e trabou, e ta produci mas hopi cu esunnan mas hoben.
Wendell Bennett tabatin hopi recuerdo di Humphrey Francisco, kende antes tabata traha cu un compania di Corsou. Cristobal “Chicho” Fabus a convence Humphrey Francisco pa bin traha cu ATCO Concrete, kende tabata traha cu Aruba Recycling. Humphrey Francisco a forma parti di e grupo di ATCO cu a traha Sonesta Island, pero na mes momento tabata traha riba e batch plant cu tabata banda di Hyatt y e tabata opera e excavator. Wendell Bennett a sigui indica cu Humphrey Francisco tabata e prome concrete pomp operator y na 1995 el a bira e prome operator di e roll on roll off truck. E ta un empleado leal y e no ta esun di mas lihe pero e tin resultadonan bon, asina Wendell Bennett a expresa.
Humphrey Francisco a comparti hopi recuerdo bunita desde e tempo cu el a cuminsa traha na ATCO Concrete y el a comparti esaki cu su coleganan. E ta gradicido pa ta cu nan y pa tur loke el a haci durante e añanan di servicio. Hunto cu gerencia di MetaCorp e celebracion a continua te den oranan di atardi laat. Humphrey Francisco y Fernando Lewis a gradici tur esnan cu tabata presente pa celebra nan añanan di servicio y pa ta nan coleganan.
Un poco historia di ATCO Concrete
Desde aña 1990 a crea ATCO Concrete, e tempo ey riba parkeerplaats di Hyatt Regency Hotel & Casino. Esaki tabata nan di dos cliente, e prome tabata Sonesta Hotel. Na 1992, ora a caba cu construccion di Hyatt, a muda pa nan edificio actual na Barcadera. Ta bon pa bisa cu na un principio e compania a inverti den un planta di concret cu por a produci 8 m3 den mey ora. Asina nan por a produci 16 m3 pa cada ora di produccion. Mientrastanto, den e añanan, debi na demanda y mercado, a inverti den un di e plantanan di concret mas grandi y miho den henter Caribe, cu ta produci 120 m3 pa ora. ATCO Concrete tin 8 empleado, cu ta maneha 3 mixer, 1 loader, 1 operator y 1 backup operator.