Home Local Por cumpra coriente prepago awor na tur stacion di gasolin

Por cumpra coriente prepago awor na tur stacion di gasolin

SHARE

Mirando e crecemento grandi den cantidad di meternan “prepago”

ORANJESTAD, Aruba – Recientemente N.V. ELMAR a reuni cu Aruba Gasoline Dealers Association (AGDA) y a yega na un acuerdo pa tur nan asociado bira bendedonan exclusivo di coriente prepago

Desde 2012 Aruba tabatin solamente 3 localidad cu ta bende coriente prepago. Na juli di e aña aki a amplia esaki pa 5 localidad. Directamente despues a sinta na mesa cu AGDA pa por a amplia e localidad di puntonan di benta di coriente prepago na Aruba. Esaki dia 1 di september ultimo a culmina den un evento di firmamento, entre N.V. Elmar y gerencia di tur stacionnan, unda cu a cera contrato cu tur stacion di gasolin na Aruba pa asina nan por bira bendedo exclusivo di coriente prepago di N.V. ELMAR.

Dentro di algun dia tur e stacionnan lo por bende di coriente prepago. Ta trata aki di tur 14 stacion di gasolin na Aruba, esta CITGO Palm Beach, CITGO Sasaki, CITGO Boulevard, CITGO Caya Grandi, CITGO Ponton, CITGO Companashi, CITGO Tanki Leendert, CITGO Seroe Blanco, CITGO Paradera, CITGO Wayaca, CITGO Santa Cruz, CITGO Savaneta, CITGO San Nicolas y tambe na CITGO Essovile.

E intencion ta pa e cliente por cumpra cualkier suma di coriente cu e ta desea, facilitando esaki den su presupuesto. Esey lo duna e cliente e control riba e suma cu e ta desea di recarga su coriente, a base di e presupuesto cu e tin disponibel na e momento ey. E ta yuda e proceso di control di un famia su gasto di coriente.

N.V. ELMAR siendo un compania nacional cu ta distribui coriente ta inverti alrededor di 20 miyon florin tur aña den mantencion y actualisacion di su red di electricidad. Cu lansamento di servicio y productonan nobo, ta demostra cu N.V. Elmar no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.