133
ORANJESTAD — Partido MEP den fin di siman a tene un accion di recaudacion di fondo pa yuda damnificadonan di St. Maarten.
Esaki a cuminsa ya caba diabierna door di candidato Daphne Lejuez cu un actividad pa recauda fondo na su Cede. E atardi aki, Daphne a bende cos dushi y cu e accion aki a recauda 1000 florin pa yuda damnificadonan di St. Maarten.
Diadomingo e hobennan di HOT, e hala hubenil di MEP, a subi caya pa sigi busca donacion pa yuda damnificadonan. E hobennan a para henter dia na diferente punto riba nos isla, San Nicolas, Savaneta, Santa Cruz, Paradera, Noord, Eagle y finalisando na Rancho den curason di Playa.
Den e accion aki nan a recauda 2500 florin.
Riba e suma aki partido MEP mes a hasi un donacion di 2500 florin tambe.
Y finalmente sra. Evelyn Wever-Croes a anuncia cu en vista cu e no lo organisa un ciere di campaña manera tradicionalmente cada candidato ta hasi, el’a dicidi di hasi un donacion tambe di su mesun campaña di 2500 florin.
Cu esaki, entre e donacionnan di comunidad, donacion di partido MEP y di candidatonan Daphne y Evelyn, e suma total pa yuda damnificadonan di St. Maarten a bira 8.500 florin!
Den un actividad yen yen di hende den Rancho, e donacion a wordo entrega na Rode Kruis.
“Den ultimo simannan dos suceso a conmove nos, y candela cu a destrui Brillo di Solo, y e orcan devastador na St. Maarten. Nos no a sinta keto y nos a dicidi di pone esfuerso pa recauda fondo, apesar cu e ultimo dianan aki di campaña ta hopi ocupa.
Awe nos por anuncia cu e suma total recauda pa yuda damnificadonan di St. Maarten ta 8.500 florin y e suma pa yuda Brillo di Solo ta 8.900 florin. Esaki ta danki na e esfuersonan di nos hala hubenil HOT cu a traha henter dia pa recauda fondo, combina cu esfuersonan di tur candidato di partido pa recauda fondo. Esaki combina cu donacion di Daphne Lejuez y mi persona, ta pone cu awe nos por hasi e bunita donacion aki.
Nos tur tin famia y conocirnan na St. Maarten y e situacion cu nan ta aden tin nos hopi preocupa. Nos ta spera cu e suma aki por trese un poco alivio pa e damnificadonan y cu Dios bendiciona e pueblo di St. Maarten”, lider di MEP Evelyn Wever-Croes a duna di conose.
Pabien na MEP y su candidatonan pa e bunita gesto aki.