Home Politics Candidato #4 PPA/UPP Raymond Hernandez: Drentando siman decisivo, ta momento di reflexion...

Candidato #4 PPA/UPP Raymond Hernandez: Drentando siman decisivo, ta momento di reflexion y no di fiesta! Eleccion ta keda un cos serio! Ta tempo pa scohe pa reformacion!

SHARE

Nos tin un otro siman tras di lomba, na unda cu nos por a mira cu atrobe tabata tin cosnan mas importante cu e situacion, e problema di nos pais y e rumbo cu nos tin di scohe. Nos a habri siman pasa cu un discusion di kende si of kende no ta core parada, of con toch lo por core parada.

Nos ta spera cu loke ta resta e dianan di e siman nobo aki nos por tende mas di loke ta contenido real di loke ta wordo ofreci. Por lo general, mayoria di e programanan, cu cierto diferencia, riba un parti grandi di solucionnan ta zona casi mescos. Tin puntonan cu nos por bisa cu ta zon hopi populistico, mientras cu no ta wordo splica con e promesanan aki lo wordo cubri. Tambe tin varios puntonan di diferencia grandi cu ta prefera di no wordo discuti riba dje, manera e aspecto di Good Governance y esun di maneho di admision, relaciona cu e capacidad di carga di nos isla.

 

Nos por a mira un fin di siman, cu coremento di parada y fiestamento. Nos di UPP ta kere cu riba esaki tambe mester bin cambionan fundamental den futuro, unda nos tin di realisa cu informacion y intercambio por medio di debatenan ta mas importante cu tur loke nos ta wak como parti di fiestamento of haci buya. E ultimonan aki sigur ta un sistema pa influencia e pueblo votador, mientras cu asuntonan di importancia nacional, manera nos seguridad, nos enseñanza, bon gobernacion, proteccion di nos mercado laboral, desaroyo economico, no ta haya e atenciona real.

Loke tambe nos por mira, cu tin hopi actonan populista y mescos tambe cu promesanan populista cu e unico intencion pa gana voto, mientras cu e berdad real mes no ta wordo atendi.

UPP ta consciente cu na Aruba nos ta den un era di “partidocracia”, unda cu cueste loke cuesta ta purba na sirbi e interes di partido, mescos cu tur cos cu ta rond di un partido. Mientras cu nos “democracia” mes poco poco ta wordo afecta mas. UPP sigur lo haci tur su esfuerzo, una vez cu nos haya Bo sosten como votador pa nos haci cambionan fundamental cu lo hisa e calidad di nos democracia, dunando e ciudadano poder, no pa cada 4 aña sino durante henter e periodo di gobernacion.

Pa UPP ta importante cu den e proximo periodo di gobernacion, nos Parlamento, cu e ultimo añanan su rol di control a wordo minimalisa completamente, mester bay conoce cambionan fundamental. Cambionan, no solamente na nivel di e ley di eleccion, sino tambe nos sistema representativo lo mester wordo poni bou scrutiño. UPP ta propone pa cuminsa cu cambionan minimo pa loke ta trata ley di eleccion, manera e secuencia di voto, pero tambe e reparticion di asiento den e caso aki e restzetel. Tambe riba e posicion di un presidente di Parlamento lo mester bay fiha su podernan cu na e momentonan aki e ta abusa di nan, strobando asina nos democracia di funciona. Pero tambe personalmente mi ta kere cu nos mester bay papia mas den direccion di cambio of mihor dicho un reforma fundamental di nos sistema parlamentario y gubernamental. Esaki pa por haci nos democracia mas bibo compara cu loke e ta na e momentonan aki. Tambe nos mester democratisa e envolvimento di nos comundiad, nos ciudadania, por medio di e.o. Dialogo Nacional, pero cu un bachi legal, unda tur e actornan den nos comunidad lo ta representa. Lo mester bay mira cu e sistema electoral ta responde mas na nos tempo, ya cu esun cu nos tin actualmente, ta uno anticua y cu defacto a wordo impone riba nos mas 60 aña pasa. Un sistema cu nos mes no a desaroya, manera tur democracia madura den mundo si a haci, ya cu nos ta un simpel copia. Ta tempo pa nos mes busca y crea e reformanan necesario cu ta cuadra cu nos propio situacion. Y esaki ta loke mi kier para pe como candidato riba e lista combina di PPA/UPP, e lista color Kaki. Dia 22 september e decision ta den bo man.