Home Uncategorized Despues di 10 aña: A verf Centro Deportivo Betico Croes na Santa...

Despues di 10 aña: A verf Centro Deportivo Betico Croes na Santa Cruz Cu sosten financiero di Stichting Fundacion Lotto pa Deporte

SHARE
????????????????????????????????????

ORANJESTAD, Aruba: Presidente di Stichting Fundacion Lotto pa Deporte  (Aruba Lottery), Sr. Di-Stefano Wernet RA a haci un bishita di trabou na Centro Deportivo Betico Croes pa mira con ta andando cu e verfmento di e facilidad. Esaki ta un cooperacion entre Aruba Sport Unie y Lotto pa duna un bon “face lift” na e edificio na e compleho deportivo situa na Santa Cruz.  E projecto aki pa e bario di Santa Cruz ta conta cu e apoyo di nos Ministro di Deporte Dr. Alex Schwengle.

 

Mantencion ta hopi importante y ta hopi costoso, segun Sr. Di-Stefano Wernet RA. Pe motibo aki mester ta cauteloso pa ora di traha diferente compleho deportivo y despues no ta haci uzo di dje constantemente. Asina aki no lo tin suficiente placa pa mantene. El a indica cu traha ta uno, pero mantencion ta dos. P’esey Lotto a renegocia e contract cu e Canadesnan y a cera acuerdo dia 6 di Januari 2017 pa por haya mas fondo.

 

Lotto a logra haya mas placa y un structura miho di “fee” cu mester paga na e Canadian Bank Note pa nan servicio. Esaki ta motibo pakico Lotto a haya mas placa pa inverti den deporte y semper ta corda riba e facilidadnan deportivo. “Nos tin cu tene cuenta tambe cu e ley di Catochi pa fortifica y asina Lotto por haya mas forsa y por sigui inverti”.

 

Ta necesario pa mantene e facilidadnan debidamente y delaster biaha cu Centro Deportivo Betico Croes a ricibi un verf tabata 10 aña pasa. Esaki a pone cu e momento a yega pe centro deportivo ricibi un man di verf un biaha mas.

 

Presidente di ASU, Gerrald Franca a duna di conoce cu mester a drech’e pa asina haci e luga agradabel pe publico, specialmente pe atletanan. Mientras cu nan ta ocupa cu esaki, na mes momento ASU ta mirando mas mantencion cu mester tuma luga pa asina mehora pe actividadnan cu ta keda teni den e centro deportivo.

 

E idea di ASU semper ta pa promove deporte den maximo forma, di cual deporte ta na alcance di tur mucha di Aruba. Di e forma cu tur mucha por haci deporte, pasobra no ta cuestion cu deporte ta pa un par of algun mucha. ASU ta ocupa cu esey, unda cu nan ta studiando diferente Proyecto pa mehora e comunicacion entre federacionnan y publico en general.

 

Aworaki tin 33 federacion activo, cual tin 2 pa 3 ta clubnan ainda. E trabou cu tambe ta hopi importante ta e entendimento cu mester existi entre e federacionnan internamente. Esaki ta algo hopi importante pe desaroyo. Na momento cu keda cla cu e verfmento di e luga, esaki lo dun’e un aspecto hopi agradabel specialmente ora cu un hende yega y por mira y sinti de nan curason cu di berdad tin algo ta sosodiendo den mundo di deporte.

 

Stichting Fundacion Lotto pa Deporte ta moviendo debidamente y a yuda ASU cu e Proyecto aki. “Nos ta hopi satisfecho y hopi contento como directiva cu nos a haya e facilidad asina pa por a haci e proyecto agradabel pe hende general”, el a termina bisando.