Home Uncategorized Lectura publico riba ‘Sistema Electoral na Aruba’ cu entrada gratis

Lectura publico riba ‘Sistema Electoral na Aruba’ cu entrada gratis

SHARE

ORANJESTAD – Proximo siman comunidad di Aruba lo tin dos oportunidad hopi importante di conoce, adelanta na e eleccion Parlamentario, con nos ta sistema electoral ta hinca den otro. Tambe por siña con y pakico ta vota y ademas con ta reparti zetel y restzetel. E anochinan di informacion pa publico ta tuma luga diamars 5 di augustus na MFA Noord y diaranson 6 di augustus na MFA Paradera; ambos anochi entre 7or y 8’or y mey.

Elton Hart, Gerente General di MFA Paradera a splica cu ta trata di un actividad cu no ta liga na un organisacion politico y en realidad, ta forma parti di nan serie di lectura informativo cu a bin ta presentando tur luna riba diferente topico. Den e caso aki, e experto cu lo hiba palabra ta mr. Luciano Milliard, kende ta un conocido experto den ley constitucional.

E contenido di e lectura ‘Sistema Electoral na Aruba’ ta consisti di e siguiente puntonan: Historia di nos sistema electoral, con el a inicia, di unda el a origina y for di ki tempo el a establece. Despues lo sigui un splicacion di con e sistema electoral ta hinca den otro, ken tur mag vota, pakico nos ta vota. Tambe lo papia riba con un partido ta yega na un zetel, kico ta un restzetel y con ta bereken esaki y, finalmente, ki ora un gobierno ta demisionario.

Entrada pa e evento ta gratis, pero ta recomenda un y tur interesa pa asisti, pa yega trempan y asina garantisa un bon luga di parkeo y pa sinta. E anochinan informativo ta wordo organisa independientemente y den cuadro di MFA su concepto di comparti informacion importante cu e comunidad unda e ta ubica. E serie di lecturanan lo continua den e lunanan nos dilanti y e temanan lo keda anuncia na su debido tempo. Pa mas informacion, por por yama 281-0001 of 281-0005.