ORANJESTAD – Departamento di Obra Publico ta informa pueblo di Aruba en general y automobilistanan en particular cu trabounan di innovacion di caya grandi lo cuminsa entrante dialuna 4 di september 2017.
E trabounan di innovacion di caya grandi lo encera drechamento di cierto coneccionnan bou tegels cu ta necesario pa instala WIFI den caya grandi y alabes instala un Sound System.
Trabounan lo cuminsa na cuminsamento di caya grandi, esta dilanti La Linda y despues move fase pa fase.
E orario ta bay ta di 8’or di mainta te cu 4’or di atardi y e trabounan lo tin duracion di 6 siman cu ta programa pa caba 13 di oktober 2017.
En coneccion cu e trabounan menciona Departamento di Obra Publico ta haci un peticion na pueblo di Aruba y tur peaton y automobilista pa tene cuenta cu e cambionan den trafico y ta pidi pa tene cuenta cu posibel inconveniencianan y ta gradici pa e comprencion.