ORANJESTAD – Durante e evento di campaña di lider di partido AVP cu a tuma luga diadomingo ultimo, un di e oradornan tabata colega y amigo Benny Sevinger. E politico a comparti cu e sala yen di Marriott Ballroom algun anecdota for di tempo cu el a conoce y cuminsa traha cu Mike Eman, un 16 aña pasa. Sevinger a haci esey pa ilustra su punto cu un lider berdadero ta cuminsa traha den humildad y ta laga su exitonan papia pa nan mes.
“Tur loke e oradornan prome cu mi a describi, esey ta Mike. Mi sinti’e, mi a bib’e. E ta un lider cu ta dialoga, cu ta papia cu hende, cu ta combence hende cu ta hunto nos ta bay padilanti. No un lider cu simpelmente tey pa yama su mes lider of pa enrikece su mes pero un lider cu ta inspira; cu ta para hunto cu comuidad y ta sinti su dolor,” Sevinger a expresa.
Despues di a perde eleccion na 2001, Sevinger ta corda con Eman a invit’e pa come y hunto nan a sinta na mesa. Aki e lider di AVP a coy un lista y a bis’e: “Esaki nos ta bay haci. Nos ta bay den pueblo, nos ta bay scucha y pensa pa trece cambio.” Sevinger ta corda cu tabata un lista largo, di metanan manera lanta fundacion Digna Lacle Herrera pa forma e politico di futuro y un ‘think tank’ cu awe ta Fundacion Mito Croes. Tambe e lista tabata inclui actividadnan manera Limin’ Green, Concierto di Speranza, pa yama bek Partijraad, yama Comision Chikito, bay den barionan y hopi mas.
Sevinger a conta con el a skirbi y skirbi y na final a bisa Eman: “Mike b’a ripara cu ta nos dos so ta sinta na e mesa aki. Nos tin un caminda largo pa bay,” na loke publico a reacciona cu humor. Su tras e politico #2 riba lista a bisa cu ta hustamente e conviccion y amor aki a sirbi Eman pa traha y inspira otronan pa traha pa e partido y, mas importante, pa su pais. “Awe no ta nos dos ta sinta, ta miles ta sinta cu bo akinan pa hiba e pais aki na un ‘next level,’” Sevinger a afirma.
For di e tempo ey caba, den oposicion Sevinger a wak Eman forma su ekipo y su plan. Na 2009 nos lider a lanta y a bisa e comunidad: “No perde speranza, mi tey. Mi ekipo ta cla, nos ta cla pa trece e cambio, nos ta cla pa cana cu e cambio aki y trece felicidad den tur hogar.” Comunidad a reacciona dunando e un mandato amplio cu 12 asiento. Pa ora a drenta Gobierno, no mester bay studia ni pensa nada, tur cos tabata prepara, tabata sa precies kico mester haci pa yuda nos pais afronta e retonan. E tabata un cambio cu a cuminsa di dia #1, na opinion di Sevinger.
Sevinger a splica cu ora bo ta drenta gobierno y bo ta haya un situacion asina scur, bo ta puntra bo mes: “Con mi ta bay cuminsa cana, unda mi ta bay cana,” y Eman cu AVP tabatin dos escogencia: Por a bisa pueblo cu a haya un situacion deplorabel y mester tuma medida; of por bisa e pueblo cu a haya un caha bashi, pero cu e tiki sen ey ta bay traha. Esey ta loke a haci tambe, a lora manga di camisa pa hiba e pais y sak’e dilanti. Tur dia sin drumi y sin sosega Mike a traha pa e pueblo. Manera e mes ta bisa: “Pueblo y pais na prome luga; pueblo y pais ta esun cu nos tin cu sirbi” y esey ta loke el a bin ta haci den ocho aña.
“Awe nos ta bin hunto pa nos bisa nos ruman…nos lider cu: Nos ta cu bo Mike; nos tey para bandi bo! For di skina di San Nicolas te na Noord, di Playa te Santa Cruz; bo hendenan ta akinan, bo hendenan ta cu bo,” asina Sevinger a finalisa su discurso, bisando ademas cu: “Awe nan a bin para firme cu nan bandera y cu un conviccion: Di aki nos ta sali y nos ta marcha cu bo amigo Mike paso dia 22 di september nos ta para cubo pa cuater aña mas.”