Home Uncategorized Richard Arends “Refineria Citgo ta un catalisador di hopi actividad economico tur...

Richard Arends “Refineria Citgo ta un catalisador di hopi actividad economico tur rond Aruba”

SHARE

SAN NICOLAS- Presente den un welding shop na San Nicolas tabata Mike Eman, Mike de Meza y Richard Arends di partido AVP pa presenta programa di partido pa e periodo 2017-2021. Oduber Contractors ta traha directamente den Citgo brindando trabou na hopi hende y ainda tin mas hende pa wordo tuma den servicio. Ora cu e rehabilitacion di e refineria keda full cla, un cantidad di 2000 mil hende ta bay haya trabou den tur ramo di e compania Citgo. Cu reapertura di e refineria economia na San Nicolas ta haya un boost enorme.

Richard Arends, candidato nr 5 riba lista di AVP a bisa cu trabounan desplega pa contratistanan ta un di e simbolonan di reapertura di e refineria. “Un proyecto cu Prome Minister Mike Eman, Minister de Meza y mi persona a maneha e negosacionnan durante e ultimo añanan. Awe nos ta un stap mas cerca di compromiso. un testimonio di e trabounan desplega pa loke ta trata rehabilitacion di e refineria. Un pilar cu ta caracterisa e historia di economia di Aruba.” Arends a splica tambe di e actividad economico principal cu ta nos turismo.

“Si bo ta wak e cifranan di e ultimo lunanan bo ta mira un mehoracion consistente. Rehabilitacion di e refineria sin duda tin su parti cu ta contribui na e actividadnan economico. Esaki kier men cu directamente e ta contribui na empleo, tambe na divisas, pero mas cu claro e refineria ta un catalisador di hopi otro actividad den area di San Nicolas como tambe tur rond Aruba.”

Arends a splica cu Citgo ta brinda un area fisico di otro inversionnan tambe. No ta apertura di e refineria so ta duna e boost economico na San Nicolas. “Tin cierto areanan cu antes tabata di e refineria ta wordo uza pa tecnologianan limpi. Den e programa di partido ‘Padilanti’ ta poni cu nos tin cinco area di oportunidadnan economico cu lo wordo desaroya a base di cuater pilar nobo . Den e area di e refineria lo tin actividadnan paralelo cu ta bay tuma lugar, pero tambe a area rond di e waf di Barcadera, tambe nos ta promove actividadnan di logistica, e area rond di e waf ‘bieu’ na Playa unda tin un masa critico riba su mes unda por wak combinacion di logistica, combinacion di tecnologianan limpi, industrianan creativo como tambe exportacion di conocimento,  e area rond di Hospital cu ta un modernisacion di e sistema di cuido, pero tambe e lo duna un empuhe pa loke ta trata turismo medico exportacion di conocimento aki tambe. E areanan rond di e obranan infrastructural cu ta bay ta hopi gefocussed riba negoshinan chikito y empresanan mediano cu ta e wes’i lomba di nos economia.”