Home Uncategorized Segun Lider di AVP Mike Eman: “Aruba awor tin un bon...

Segun Lider di AVP Mike Eman: “Aruba awor tin un bon nomber internacionalmente y ta wordo reconoci mundialmente”

SHARE

ORANJESTAD – Lider di AVP Mike Eman den su evento grandi di diadomingo ultimo a papia di e energia cu e ta haya di Creador pa traha pa e pueblo y Aruba. “Pa ta un sirbidor di e pueblo,” el a bisa. E líder a papia tambe di e trabou cu mester haci pa pais Aruba, cu ta hopi mas grandi cu hopi hende ta pensa.

Principalmente e trabou cu ta wordo haci internacionalmente pa pone Aruba riba mapa, pa habri portanan cu tabata cera pa hopi tempo, pa pone Aruba den conexion cu partnernan cu por nifica un cambio pa e pais aki. “Ora cu e vice presidente di Merca puntra e prome minister di Aruba, entre tur e presidentenan grandi di Latino America y Caribe,  pa sinta banda di dje, e no ta un reconocimento pa Mike Eman, pero un reconocimento pa Aruba henter. Nos tin cu sinti’e, pasobra nos tin cu sigui biba e momentonan di crea diferencia pa nos pais. Ora cu Reino Hulandes pidi nos firma un di e tratadonan di mas importante di e siglo aki di cambio climatologico, no ta Mike Eman ni prome minister di Aruba ta haya un reconocimento pero e pueblo di Aruba,” e lider eminente a señala. Di e forma aki un y tur por mira e importancia di e rol di Aruba den mundo cu a crece durante e ultimo añanan. E isla aki no ta simplemente un destinacion turistico cu bunita beach y solo, pero a bira un vitrina di e trabou cu ta wordo haci riba tereno di durabilidad y sostenibilidad cual ta un ehempel pa paisnan chikito di mundo, cu si Aruba por logre, nan tambe por.”

Awor cu Aruba ta den momento di eleccion pa un Parlamento y Gobierno nobo, ta ora pa pueblo scoge cu si kier sigui cu e ambicion cu Aruba kier pasa ariba limitenan cu mundo ta kere ta diseña pa un isla chikito. “Nos tin cu sinti den nos curason cu nos no kier bay bek den e tempo no ta spera nada di Aruba cu loke ta spera averahemente di un isla chikito. Nos no kier bay bek na e pensamento cu un isla chikito no por ta lider, cu un isla chikito no por ta esun cu ta dirigi metanan grandi cu ta surpasa nos fronteranan. Nos tin cu keda tene na e vision cu nos grandinan tabatin na momento cu nan a bisa cu ‘nos kier ta baas den nos mes cas’, nan a sinti cu Aruba por mas y cu por surpasa su limitenan di espacio,” Eman a bisa.