Home Uncategorized MEP: Maneho hudicial y nos prioridad pa haci Aruba mas sigur

MEP: Maneho hudicial y nos prioridad pa haci Aruba mas sigur

SHARE

 

E naturalesa di criminalidad na Aruba a cambia hopi den e ultimo añanan aki. No solamente cierto delitonan a aumenta sino tambe e crimen organisa a cuminsa haya forsa, hasta den gobernacion. Atraconan arma cu arma sumamente sofistica. Un averahe di 16 auto ta wordo horta pa dia. Den e prome shete lunanan di aña 2017, nos a conoce casi 60 atraco arma y algun asesinato. Atraconan ya no semper ta wordo raporta na Cuerpo Policial mas, pasobra Cuerpo Policial no por atende cu tur.

“Poverty is the mother of all crimes”, (Pobresa ta mama di tur crimen) y e realidad ta cu tanten cu nos no tin desaroyo economico real, tanten cu nos tin hopi pobresa y tanten cu no tin perspectiva, e problemanan di criminalidad lo sigui aumenta. Pero nos lo no sinta man crusa.

MEP lo percura pa tur e actornan riba e tereno di husticia funciona optimal. MEP tin e determinacion pa combati criminalidad cu man duro. Cu un plan ambicioso, pero realistico, MEP lo haci Aruba mas sigur, cuminsando cu control severo di nos costanan, y unabes nos costanan ta controla, MEP lo pone ordo paden den cas y lo enfoca mas riba prevencion.

Pasobra tanten cu arma, droga y personanan sigui drenta Aruba na forma ilegal y sin control, bo no por pone ordo den cas.  MEP lo haci Aruba un lugar mas sigur pa un y tur, y lo promove husticia den tur sentido. Legalidad riba ilegalidad. Nos prioridad ta Aruba su siguridad. Cu nos plan di vision, nos lo trece solucionnan y alivia e problemantica creciente aki.

Dia 22 di september proximo, brinda lider di MEP y Partido MEP bo confiansa pa e proximo gobernacion. Pa MEP, Aruba ta prioridad. Y hunto nos ta logra trece e cambio cu Aruba mester y ta anhela na dje.