Home Uncategorized Director di Dienst Publieke Scholen, Whitney Kock Den reunion a sali afo...

Director di Dienst Publieke Scholen, Whitney Kock Den reunion a sali afo cu tin lista di espera largo di studiante Tin deseonan pa bin cu mas scolnan publico

SHARE

ORANJESTAD, Aruba: Dialuna mainta Dienst Publieke Scholen a reuni, manera tur aña, riba e prome dia di vakantie escolar. DPS ta reuni cu tur cabesante y director di scolnan publico unda cu nan ta refleha riba e aña cu a pasa. Director di Dienst Publieke Scholen, Whitney Kock a bisa despues cu e reunion a bay den un ambiente ameno y informal.

 

Durante e reunion nan a pasa riba e aña escolar y a comparti miho practica, tambe e cabesante y directornan a comparti cosnan cu a bay menos bon y cu nan lo mester bay adapta pe siguiente aña escolar. Na mes momento nan a probecha pa despedi di Mimi Lampe di DPS, kende den e ultimo 2 aña a fungi como funcionario di staf encarga cu enseñansa. “Esaki tabata e momento cu nos por a dese’e tur clase di exito den e reto nobo cu el a tuma”, di acuerdo cu Whitney Kock.

 

Den nan discurso e cabesante y directornan a trece padilanti cu a resalta e scarsedad existente di cuponan na scolnan publico, unda ta existi ta listanan largo di espera. Pa por cumpli cu e demanda aki y un di e deseonan ta pa bin cu mas scolnan publico. “Nos kier a desea tur e personanan cu ta duna les y esnan cu ta sostene e proceso aki, un bon vakantie mereci pa asina cuminsa e aña escolar nobo cu tur energia cu nan mester”, Whitney Kock a expresa.