Home Uncategorized Minister di Enseñansa, Michelle Hooyboer-Winklaar Scol a keda renoba y tin aspectonan...

Minister di Enseñansa, Michelle Hooyboer-Winklaar Scol a keda renoba y tin aspectonan cu no tabatin prome Mantencionnan chikito ta keda den man di schoolbestuur SKOA

SHARE

ORANJESTAD, Aruba: Sint Rosa College a habri su aña escolar den nan propio edificio cual a keda renoba. Minister di Enseñansa, Michelle Hooyboer-Winklaar a bishita e scol pa asina mira con bunita e scol a keda, pero tambe pa haya sa for di e maestronan, cabesante y muchanan kico nan ta pensa di nan scol. Durante bishita di e mandatario, e muchanan a canta himno di scol pero tambe un alumno a duna palabra di gradicimento na minister di a laga renoba e scol. Minister Hooyboer-Winklaar a keda emociona cu e palabra di e alumno.

 

E mandatario a ricibi un tour chikito pa asina por mira e cambionan chikito cu a tuma luga den e ultimo aña escolar. A inicia un renobacion completo di e edificio, cual ta un edificio cu tin mas di 60 aña bieu. Ministerio di Enseñansa a bishita e scol tres aña pasa y aki e aspecto a bin dilanti. Pero tambe muchanan a skirbi diferente carta unda cu nan ta vocifera cu nan a warda hopi aña. Tur esaki a trece cun’e frustracion pero di otro banda ta rekeri pasenshi tambe. Pasobra e proceso pa por a yega na esaki, e scol mester a keda ubica na un otro edificio cual no tabata pa un scol. Nan a haci esey den un periodo di 2 aña y mey.

“Nos ta contento di por a haya e cooperacion di nan parti. E ta un tiki give and take, pasobra e no ta un situacion optimal pa un periodo basta largo”, el a duna di conoce. Na final di dia a haya un edificio renoba, nobo, diferente aspecto cu no tabatin prome. Minister Hooyboer-Winklaar a gradici e team di juffrouw Lai-Ping Carti-Cheong cu a sa di tene hopi pasenshi, pero sigur nunca a perde e speransa cu un dia lo yega na esaki. E mandatario tabata sumamente contento di por a yega na dje den un periodo bastante cortico.

 

Minister Hooyboer-Winklaar a puntra e muchanan si nan sa cuanto ta costa pa haci un renobacion asina aki y na mes momento el a splica nan cu esaki ta alrededor di 6 miyon florin pa renoba un scol di e tamaño aki. Esey ta pone cu poco poco ta yegando na e diferente scolnan cu mester renobacion completo, apesar di haci trabounan aki y aya unda ta drecha e cosnan mas urgente. Pa por yega na un renobacion completo, e ta un trayecto largo. Riba e lista di prioridad tin 5 scol cu tin e necesidadnan mas urgente, cu ta St. Aloyuis School, Cayena Kleuterschool, Imelda Kleuterschool, Reina Beatrix y Julianaschool cu ya caba a keda muda pa otro caminda. Pa e scolnan aki ta en espera di e fondonan keda cla pa por cuminsa cu e proceso di renobacion. Tambe riba e lista di 83 scol, tin esunnan cu mester di diferente cos.

 

E parti di renobacion ta keda bin dilanti cual ta un aspecto hopi importante. Tin cosnan cu e directiva di scolnan por haci y ta keda financia door di e subsidio cu nan ta ricibi. Esaki ta pa por sigui cu e mantencion cu no ta keda na final di dia. Cosnan cu kibra completamente, ta mustra den direccion di gobierno pa bin drech’e. Pero e mantencion ta keda den man di e directivanan di scolnan. SKOA tin e 85% di scolnan, edificionan tambe ta propiedad di SKOA. Hopi biaha hende no ta compronde cu edificio no ta di gobierno.

Gobierno a aloca fondonan pa por haci e renobacionnan conforme ley. Pero ley tambe ta bisa cu parti di e mantencion, specialmente pa edificionan cu no ta propiedad di gobierno, ta keda den man di e school bestuur cu ta SKOA. “Nos ta spera di por sigui traha riba e claridad cu tin akinan,” Minister Hooyboer-Winklaar a expresa. Tambe pa mustra precies unda tin e aspectonan cubri via e landsverordening di subsidio y pa por sigui traha pa haya e fondonan necesario pa haci esunnan grandi. Mientras a keda subsidia e mantencionnan chikito den man di directivanan di scol, pa nan sigura cu tur trabou grandi cu haci awo keda den un bon estado pe añanan cu ta bin.