ORANJESTAD, Aruba: William “Willie” Cornelius Apolinario Maria Illes, naci dia 31 di januari 1960, a drenta den servicio di gobierno dia 1 di november 1982. Na 1978 el a termina su MAVO, mientras cu na 1982 el a drenta den servicio di gobierno na Voogdijraad. Den su trayectoria el a haci diferente curso unda cu na 1989 el a haci curso di “Publiek en Privaat recht”, 1990 Middle Management, na 2000 diferente curso di computer y na 2002 Curso Corector di Papiamento.
Na comienso di aña 2003 Veterinaire Dienst tabata en busca di un Chef Administratie. Aki ta caminda cu William a pidi overplaatsing for di su funcion anterior na Directie Voogdijraad pa Veterinaire Dienst como Chef Administratie. Willie tabatin un tremendo conocemento riba e tereno di Financiele Administratie y tambe riba e parti huridico cu el a siña den su carera na Voogdijraad. E trabou nobo di Willie na Veterinaire Dienst tabata rekeri hopi responsabilidad, pasobra Willie mester a zorg pe parti administrativo, hunto cu Hoofd van Dienst tabata coresponsabel pa e parti financiero.
Den e parti financiero Willie semper a mustra cu e tin un caracter fuerte y hopi confiabel y a sabi di haci su trabou manera mester ta. Semper e tabata atento cu presupuesto y fin di aña tabata un honor pa Willie comparti cu demas coleganan cu Veterinaire Dienst, como un team, a logra surpasa entrada di Veterinaire Dienst compara cu e aña anterior.
Willie tabata un experto den traduci documento na Hulandes pa Papiamento. Ora di pone aviso of anuncio den corant, semper Willie tabata esun cu tabata traduci y haci coreccion manera debe ser.
Willie sigur tabata un ehempel pa tur cu a traha cu’ ne y un “role model” pa sigui. Su coleganan di Veterinaire Dienst sigur lo sinti su falta. Cu Willie sosega na paz.