Home Uncategorized Lider di POR, Otmar Oduber Combatimento di criminalidad ta cana man den...

Lider di POR, Otmar Oduber Combatimento di criminalidad ta cana man den man cu integridad

SHARE

 “Combatimento di criminalidad ta nos prioridad number uno. POR ta enfoca fuertemente riba restauracion di siguridad pa asina comunidad por biba trankil y sin temor di bira victima di criminalidad. Pero, combatimento di criminalidad mester cana man den man cu integridad di gobernacion, gobernante y parlamentarionan. Ta p’esey POR ta boga pa riba termino cortico, institui un departamento nobo, yama Oficina di Integridad (Bureau Integriteit) cu e tarea pa formula y implementa un maneho integral pa promove integridad y bon gobernacion”. Esaki na opinion di lider di POR, Otmar Oduber, elaborando riba vision di su partido pa e periodo di gobernacion 2017-2021.

 

Segun Oduber, den e maneho integral pa combati criminalidad, POR ta enfoca tanto riba prevencion como tambe represion. Den e cuadro aki lo dirigi e esfuersonan y solucionnan di maneho riba e desaroyo y factornan cu ta causa of contribui na criminalidad.

 

Ta un hecho cu den prevencion di crimen, bon ehempel ta hunga un papel crucial. Un comunidad semper ta tuma ehempel di su lidernan y ta pesey mes mester zorg pa riba termino corto, inicia procesonan pa yega na un cambio di cultura politico riba nos isla. Den e proceso di cambio di cultura politico cu POR ta boga p’e lo, incorpora e aspectonan di integridad, transparencia y bon gobernacion. Gobierno ta traha cu placa di pueblo y pueblo tin derecho pa tin un bista cla y completo con gobierno ta maneha su placa y pa tin e siguransa tambe cu gobierno ta maneha su placa na un forma drechi, serio y responsabel, di acuerdo cu Otmar Oduber.

 

E lider di POR ta finalisa bisando cu, pa un democracia por funciona bon ta necesario y importante pa tin un sistema di “checks and balances” cu ta funciona bon y ta preveni, of en todo caso limita grandemente e probabilidad, cu gobernantenan ta tuma decisionnan descabeya of iresponsabel cu no ta na interes general di nos pueblo. Den e cuadro aki lo duna respet y e recursonan necesario na e organonan di conseho y control cu ta forma un parti asina importante di nos sistema democratico. Aki ta referi na Raad van Advies, Algemene Rekenkamer Aruba (ARA), Centrale Accountantsdienst (CAD) y Sociaal Economische Raad (SER).