ORANJESTAD, Aruba: Aruba ta un isla cu semper durante temporada di yobida ta keda confronta cu malesanan cu ta wordo transmiti pa e sangura Aedes aegypti. Pa evita e situacion aki, e poblacion mester coopera pa asina yuda preveni y elimina criadero di sangura. “Departamento di Salud Publico (DVG) ta traha duro riba e parti aki di prevencion” Dr. Maritza Ordoñez, Consehero Medico di DVG ta splica.
Dr. Ordoñez a agrega cu si bo tin taira den bo cura elimin’e, mescos cu cierto mata, manera Bromelia, palma cu por retene awa caminda sangura por pone webo. E sangura Aedes aegypti por transmiti tres sorto di enfermedad: Dengue, Chikungunya y Zika. Na Aruba 80% di e poblacion a yega di haya Dengue caba. “Dengue ta un enfermedad cu por ta mortal. Si den pasado bo a haya Dengue caba y bo bolbe keda infecta bo por haya dengue hemoragico cu por ta fatal. Den caso di Zika, esaki por trece complicacion den desaroyo di e celebro di un baby.
Esaki ta e motibonan pakico ta importante pa hunto como comunidad nos ta alerto y tuma nos responsabilidad y percura pa rond di nos cas ta liber di criadero di sangura. Dos biaha pa siman, sali, cana rond di bo cas y tira un bista primordialmente ora poco awa a yobe. Controla tambe paden di bo cas pa criadero y pa sangura cu por ta scondi den scuridad manera bou cama, den cashi of den garashi unda cu tin hopi articulo warda. Si acaso bo ta ripara cu tin hopi sangura den bo bisindario y bo no sa e origen, yama Gele Koorts Muskieten Bestrijding (GKMB) y nan lo duna un man y haci investigacion si mester pa haya sa e origen di e problema.
Ultimo tempo e sanguranan tambe a cambia nan estilo di bida. Awo nan no ta biba den awa limpi so, pero tambe den awa sushi. Nan ta pica bo den dia y anochi. “Awo henter dia nan ta busca pa pica. Nos tin cu bira mas alerto y creativo ora nos ta busca criadero, tanto pafo como paden di cas. Prevencion ta keda e miho solucion pa evita Dengue, Chikungunya y Zika”,Dr. Maritza a expresa.