Home Uncategorized MEP: AVP no a hinca ningun cen extra den e fondonan social!...

MEP: AVP no a hinca ningun cen extra den e fondonan social! Ta e participantenan di SVB, APFA y AZV mes mester paga pa e medidanan cruel imponi riba nan lomba

SHARE

Despues cu e gobierno di AVP a debilita e fondo di SVB door di no paga (exonera) un debe di 61 miyon florin, despues cu nan a perhudica e pensionadonan di APFA door di kita nan Bashi Premie y Gelijk Bedrag, despues cu nan a aumenta e debe na APFA drasticamente y despues cu nan a impone e medida di BAZV riba lomba di pueblo, awe ainda e politiconan di AVP tin e curashi di bisa cu ta Gabinete Eman a scapa e tres fondonan aki. Sinembargo hechonan concreto ta demostra lo contrario.

 

Medidanan SVB

Gabinete Eman a introduci e medida di aumento di e edad di pensioen di biehes di 60 te cu 65 aña. Consecuentemente e pensionadonan mes durante 5 aña ta inyecta sumanan grandi den e fondo di SVB: Un pensionado soltero cu ta cobra 1050 florin na pensioen pa luna, durante 5 aña largo lo no cobra esaki y consecuentemente e ta inyecta 63 mil florin den e fondo di SVB. Y un pareha pensionado lo inyecta un suma di 108 mil florin. Alabes Gabinete Eman a aumenta e prima di AOV cu 2% y a individualisa e primanan cu e consecuencia cu desde 2011 e parehanan casa no ta haya nan restitucion di e prima di AOV mas, cual ta core den miles di florin pa aña.

 

Medidanan APFA

Pa e ambtenaarnan Gabinete Eman a aumenta e edad di pensioen te cu 65 aña. Pues e ambtenaarnan tambe lo perde di haya sumanan substancial durante 5 aña largo y tur e sumanan extra aki lo wordo inyecta den e fondo di APFA. Fuera di esey Gabinete Eman a introduci e franchise di Af. 17616 pa aña, middelloonregeling, a reduci e porcentahe di aculumacion di pensioen di 2.15% te 1.75% y tambe a reduci e duurtetoeslag for di 36% te cu 17% cu consecuencia cu den futuro tur e pensionadonan lo cobra un pensioen debilita. Mas ainda Gabinete Eman a manipula y haci negoshi di cangreu door di hinca 184 miyon florin den e fondo di APFA y p’asina por yega na un cobertura di pensioen di 100%, pero pa logra esaki nan a crea un debe extra door di fia e 184 miyon aki for di e propio APFA!

Nan ultimo hazaña ta di elimina e Bashi Premie y Gelijk Bedrag desde 1 di januari 2015 y e medida aki lo conta tambe pa e ambtenaarnan cu den futuro lo bay cu pensioen. Fuera di esey nan a logra na aumenta e debe di gobierno na APFA te na 820 miyon florin na final di 2015.

 

Medidanan AZV

Pa loke ta e fondo di AZV, Gabinete Mike Eman a reduci drasticamente e contribucion di gobierno (“landsbijdrage”) na AZV. Si durante e periodo di Gabinete Oduber (2002-2009) un suma averahe di 124 miyon florin a ser transferi pa e fondo di AZV, durante Gabinete Eman (2010-2015), e suma averahe a baha te na 98 miyon florin y lo sigui baha. Fuera di esey nan a aumenta e prima di AZV cu 1% y a introduci un BAZV di 2% y cual a genera un entrada di 309 miyon florin den e ultimo 3 añanan.

 

Pues por conclui cu tur e fondonan di SVB, APFA y AZV a ser fortifica door di tur e sacrificionan cu e trahador y pensionadonan mes mester a haci pasobra nos tin un Gabinete Eman cu no a hinca ningun cen extra den e fondonan aki, pero a crea debe y implementa solamente medida y mas medida riba lomba di pueblo y pa awe nan ta gaba cu ta nan ta e gran salbadornan di e fondonan aki.

Ta p’esey e mensahe ta bay na tur e pensionado y ambtenaarnan pa huzga tur e echonan aki di Gabinete Eman y sea consciente ora di deposita boso voto dia 22 di September proximo.