Home Uncategorized Otmar Oduber, lider di POR: Mester di un revolucion economico pa mehora...

Otmar Oduber, lider di POR: Mester di un revolucion economico pa mehora clima di inversion

SHARE

Den e proximo periodo di gobernacion, POR lo percura pa introduccion di incentivonan fiscal atractivo, stimula creacion di un fondo di inversion y brinda e infrastructura necesario cu e meta pa desaroya un sector economico nobo. E sector aki, cu lo mester percura pa empleo pa ‘young professionals’, ‘millennials’ y otronan cu ambicion pa progresa, lo enfoca riba companianan high tech, E-business, startups, business incubators, companianan fintech y otro actividadnan economico innovativo basa riba  e sector creativo  y huso di tecnologia nobo. Di e forma aki Aruba lo logra diversifica su economia, creando empleo di calidad pa un y tur.

 

Otmar Oduber ta splica cu den e “revolucion economico” cu POR ta para p’e,  lo introduci un “Crisis- en herstelwet”, esta e Ley di Restauracion Economico (LRE) cual, entre otro, lo aumenta efectividad y eficiencia di servicionan cu sector publico ta brinda na sector priva. Lo elimina “red tape” y tardansa innecesario den proceso di otorgamento di diferente permiso, por ehempel permiso di establecimento (vestigingsverunning) y lo acelera procesonan di incorpora compania, otorga tereno, bouwvergunning y aprobacion di plan di verkaveling.

 

Basicamente e ley aki lo haci posibel cu inversionnan priva por tuma luga na un forma acelera. E reforma di e sistema di impuesto cu POR ta propone, ta contribui na mehoracion di e clima di inversion na Aruba, mirando cu pa sector priva e cambionan den nos sistema fiscal lo nifica entre otro cu e costo di haci negoshi lo baha.

 

Tambe lo implementa un maneho cu ta garantisa trato y oportunidad igual na tur inversionista, unda lo cuminsa na elimina nepotismo y asina evita bentaha inhusto, para e practica di duna beneficio desproporcional na inversionista di afo y percura cu tin condicionnan atractivo igual pa tur inversionista. Lo mester brinda oportunidad igual pa participa na destaho publico di gobierno pa proyecto y compra di producto y servicio. Lo promove gana di haci negoshi, door di stimula cultura di haci negoshi den nos comunidad y brinda mas apoyo na inversionista local. Esaki tanto den conocemento di ley, sistema di impuesto como tambe pa yuda facilita acceso na capital. Den e cuadro aki lo promove sistemanan alternativo di financiamento, manera “growth fund”, “venture capital”, “crowdfunding” y “microfinance”.