Home Uncategorized Di SHETE donacion di Aqua48 a bay pa Fundacion Ambiente Feliz

Di SHETE donacion di Aqua48 a bay pa Fundacion Ambiente Feliz

SHARE

Diabierna 18 di augustus, Aqua for Aid (Aqua48) a otorga su di SHETE donacion recauda cu awa bendi na restaurantnan participante. Manon Hekman di Aqua48 a entrega e donacion di 3.500 florin na señora Lukee Croes di Fundacion Ambiente Feliz. Esaki ta un fundacion cu ta ofrece un bibienda adoptivo cu cuido 24 ora pa dia, pa 20 cliente cu un limitacion mental. Tawata presente tambe representantenan di WEB y CEDE Aruba cu ta partner den e proyecto aki. E donacionnan aki ta bira posibel danki na clientenan cu ta paga 1 florin pa awa den glas di Aqua48 den restaurantnan participante. E siguiente donacion ta bay pa e proyecto Crijojo Trappers Aruba.

 

Pa e cuartal tras di lomba, e comicion cu representantenan di WEB Aruba y CEDE Aruba a scohe pa e donacion di Aqua48 bay pa Fundacion Ambiente Feliz.  Actualmente e fundacion ta drechando e cura di e bibienda pa optimalisa e seguridad. Ademas lo pone un afdak y porch dilanti di e cas. E contribucion di AQUA 48 lo yuda cu e landscaping, ferf y mobilario pa asina haci e porch di e cas agradabel pa e clientenan.

 

Siguiente donacion pa Criojojo Trappers

E donacion di Aqua48 pa e siguiente cuartal lo bay pa e proyecto Crijojo Trappers Aruba di Nisi Canis Heart of Gold Foundation. E proyecto tin como meta pa baha e cantidad di cacho di caya y yega na un populacion di animal di caya saludabel y sterilisa. Na mes momento kier conscientisa pueblo con pa trata animal, kico ta encera e gastonan pa tene animal y enfatisa e importancia di sterilisacion pa evita cu ta dump puppies riba caya of manda nan pa e killcage.

 

Aqua48, CEDE Aruba y WEB Aruba ta gradici y na mes momento ta haci un yamada na comunidad pa sigui aporta na e bon causa, bebiendo Aqua48 den e restaurantnan participante.  

Oradornan durante e conferencia di prensa:

  • Manon Hekman, Aqua48
  • Lukee Croes, Fundacion Ambiente Feliz
  • Daniël Tecklenborg, CEDE ARUBA