Home Uncategorized Setty Christiaans-Yarzagaray (MEP): Nos ta warda pa cosnan gandi pasa siendo nos...

Setty Christiaans-Yarzagaray (MEP): Nos ta warda pa cosnan gandi pasa siendo nos mester traha mas riba industrianan chikito pa stimula economia

SHARE

Na luna di mei caba por a tuma nota den un rapport di Banco Central di Aruba, cu ta e Economic Outlook, un grafiek na unda nan a indica posibel scenario di crecemento economico. Un scenario ta cu actividad di refineria y e otro scenario ta si no ta bay tin actividad economico di parti di refineria basa riba contractnan firma cu Citgo. Den e rapportnan di Banco Central tawata menciona tambe cu e scenario di crecemento economico aki tawata cu e condicion cu actividadnan den refineria mester cuminsa pa luna di juli.

Awe nos a yega mita di augustus y te ainda, cu excepcion cu a cuminsa traha algun vivienda pa posibel trahadornan di e refineria, no por constata cu tin algun actividad di rehabilitacion di e refineria, manera tawata palabra.

Den transcurso di e wardamento aki tempo ta pasa y Aruba su economia, comercio y pueblo no por keda para warda wantando nan rosea te ora cu bin algun actividad. Ya por a constata caba caida di -0.5% den 2015 y un otro caida di -0.2% den 2016 di GDP. Hasta por bisa cu turismo tampoco no ta mustra alentador paso te cu luna di juni 2017 e cantidad di stayover a experencia un caida di 8.7% y esey cu aña 2016 a caba cu un caida den stayover visitors di 10.0%.

Den MEP su programa nos ta presenta solucionnan pa e situacion economico. Den mi pensamento nos na Aruba ta wardando cosnan grandi pasa pero den mi opinion nos mester traha riba cosnan chikito atrobe y no por keda para wak y warda te ora algo grandi sosode. P’esey nos di MEP ta kere den traha y stimula industrianan chikito na unda cu economia por ta mas varia pero tambe pa no crea un solo of dos pilar grandi y asina haci nos economia mas vulnerabel. Nos ta keda kere cu mester stimula mas den plantacion, cria y pesca. Tin tecnologia nobo awendia cu ta wordo aplica na otro paisnan cu por wordo adopta na Aruba mirando Aruba cu limitacion di awacero. Tambe den e mundo di innovacion nos di MEP ta pensa cu mester stimula y guia hobennan cu tin interes pa bira ‘young entrepreneurs’ ademas di sigui guia negoshinan existente pa ta mas exitoso. Asina por stimula mas negoshi chikito y mediano enbes di grandi so! Ya tin departamentonan di Gobierno cu tambe ta trahando riba esaki y esey lo conta cu MEP su sosten tambe. MEP ta pensa di por aporta cu un Banco di Desaroyo unda aki lo por yega na remarke pa fondo pa inverti den otro industrianan y cu guia p’asina sigura cu ideanan por wordo realisa.  

Nos di MEP ta dispuesto pa marca historia atrobe manera tawata e caso na 2008 mirando cu te ainda crecemento economico no por a yega e nivel aki bek apesar cu awe tin inversionnan grandi haci hustamente pa stimula economia. Aki por ripara cu e vision di inverti pa stimula no tawata tin su frutonan. Te ki dia nos pueblo mester keda warda? Nos di MEP ta para cla pa contribui na e cambio!