Tur cos ta mustra cu pais Aruba durante e ultimo 8 añanan a ser goberna pa un team di domino bao di palo. Esaki a bira bisto un biaha mas siman pasa na momento cu e parlamentario di AVP, Rene Herde manera un gran mago a goochel un grafiek manipulativo caminda e kier mustra cu e desempleo durante e gobernacion di AVP a ser reduci te na 5% na 2017. Alabes den e grafiek Rene Herde mes ta indica cu na 2010 (Gabinete Eman!), esta bao di su propio gobierno e desempleo tabata 11%, un record cu a ser kibra pa AVP desde algun decada caba.
Contradiccion total
Awor e dobel 6 den e team di domino di AVP a horca na momento cu Minister di Finansa, Angel Bermudez den un conferencia di prensa siman pasa a declara cu “e cifra di desempleo na 2017 ta alrededor di 7.7% ”. Alabes el a declara cu bao di e hobennan e cifra di desempleo ta mas alarmante y espantoso ainda, esta di 20%! Awor ta increibel cu e parlamentario Herde cu mester controla gobierno ta bisa cu e desempleo ta solamente 5% y pa den e mesun rosea su Minister di Finansa a declara cu esaki ta 7.7%, pues casi 8%.
Brevet van onvermogen
Alabes ta increibel con durante e periodo di 2009 pa 2015 e gobierno di AVP a hereda den total 970 miyon florin for di Gabinete Oduber y riba dje nan a fia 1.7 biyon florin – pues den total a haya 2.7 biyon extra na entrada – y asina mes nan no a logra crece e economia p’asina mas hende por haya trabao den e pais aki. Pues esaki un ‘brevet van onvermogen’ total pa Gabinete Eman y AVP.
Ta un berguensa con un gobierno durante 8 aña no a sa di maneha e pais aki den forma responsabel y ainda nan tin e pudor di pidi confiansa di pueblo pa un otro 4 aña mas.