Home Uncategorized Famia di Cuerpo Policial a despedi algun Polis y a celebra aniversario...

Famia di Cuerpo Policial a despedi algun Polis y a celebra aniversario di otronan Trabou di Polis ta pa bida! E ta e arte di sirbi bo comunidad, tanto durante ora di trabou como den oranan liber

SHARE

ORANJESTAD, Aruba: Cuerpo Policial Aruba recientemente a despedi di algun miembro cu a baha cu pensioen y a celebra esaki na grandi, pasobra hopi di nan tin un trayecto largo den e cuerpo di Polis. Altocomisario mr. Adolfo “Dolfi” Richardson a expresa cu nan a tuma tempo pa despedi di e Polisnan y a haci esaki na un manera digno.

 

A tene e celebracion hunto cu e familiarnan di e pensionadonan. E mainta tabata ameno, a conta hopi joke pero tambe a conta hopi experiencia di e Polisnan aki. Altocomisario Richardson a aprecia cu a haci esaki. Tambe e ta duna un empuhe na esunnan cu a bay, pa asina nan sa cu semper nan lo sigui pertenece na e famia di Polis. “Esey ta algo cu nos kier conscientisa nos miembronan di esaki” Altocomisario Richardson a duna di conoce. Semper un ex empleado di Cuerpo Policial por conta cu e apoyo di nan na cualkier momento.

 

E trabou di Naldi Tromp a inicia 40 aña pasa den Cuerpo Policial unda cu el a sa di crece. Naldi Tromp ta un Polis ehemplar y a demostra esaki den su añanan di servicio. Cuerpo Policial a reconoce cu un plakkaat y un regalo mas. Naldi Tromp a celebra den compania di su famia y coleganan. El a probecha di mustra su coleganan algun potret di tempo cu el a cuminsa cu ta recuerdonan valioso cu e tin. Naldi Tromp a gradici su famia cu semper a sostene y su coleganan.

 

Ricardo Muller a cumpli 40 aña den servicio di Cuerpo Policial, e tabata masha contento cu e celebracion. El a gradici Dios pa tur e añanan cu e tabata den Cuerpo Policial, pero tambe hopi otro persona cu no t’ey mas den KPA. E ta gradicido pe cooperacion cu semper el a ricibi na diferente momento. A pasa momentonan di alegria, pero tambe momentonan di stress.

 

Luis Tromp tin mas di 40 aña den Cuerpo Policial y el a gradici pe tempo cu e tin desde comienso te cu awo, tambe Korpschef pa a kere den su persona. Den e trabou aki el a conoce hopi hende y a traha cu hopi di nan. El a expresa cu Polisnan no por logra sin nan famia y cu stress ta forma parti di e trabou.

 

Edna Zievinger a gradici su sobrinonan pasobra ta danki na nan e por a yega asina leu. E tin KPA na pecho. El a splica cu pa bira Polis mester tin e trabou na curason pa por atende cu pueblo. Esun cu ta traha como Polis ta e cara di Cuerpo Policial.

 

Sinclair Thiel no a traha hopi tempo den Cuerpo Policial, pero e tin hopi experiencia y a aporta hopi den administracion. No tur ora e trabou ta facil, pero e team cu e tabata traha cun’e a percura cu e coleganan tabata haya nan overtime. “Danki na tur hende y mi ta desea boso tur cos bon. Coleganan sigui cu e bon trabou y ex coleganan disfruta di e pension”, el a expresa.

 

Rudolf Thijsen ta un persona cu nunca ta para keto tanto na cas como trabou. El a pasa den diferente trayecto den diferente departamento. Esaki a pone cu su mente ta mas amplio y esaki a dun’e mas experiencia den bida. Sin e sosten di famia, e trabou ta bira hopi mas dificil.