98
ORANJESTAD — Den un multitud cu a surpasa tur expectativa, partido MEP a entrega e lista victorioso pa eleccion 2017. Riba e lista ta figura 29 candidatos, di peso, cu a causa un impacto grandi na Aruba. Nunca antes tabata tin un expectativa asina grandi pa cu e lista di MEP, especialmente despues di a lansa tanto candidato di peso.
Lider di MEP Evelyn Wever-Croes, visiblemente hopi contento y orguyoso a presenta e lista diahuebs anochi caba den un Partijraad Extraordinario, y despues mesora LIVE riba Facebook.
E candidatonan tabata sumamente anima, y visiblemente contento cu e lista presenta.
Y e multitud cu a compaña partido MEP pa entrega e lista diabierna, ta un confirmacion di e aceptacion di candidatos riba lista di MEP. E lista ta mustra un combinacion di caranan nobo den politica, di personanan no desconosi den nos comunidad. Hopi “young professionals” cu ta e futuro pa carga nos pais, combina cu caranan di experiencia den politica. E combinacion perfecto pa un team cu mester rescata nos pais. Un pabien grandi ta bai na e lider di partido Evelyn Wever-Croes, cu un lista bon balancea, y cu hopi prospecto.
Lider di MEP a duna di conose den conferencia di prensa, cu e ta hopi agradecido na e candidatonan cu a brind’e e espacio pa por a hinca e lista den otro di e forma aki. “E candidatonan riba lista di MEP ta hendenan cu tin Aruba na pecho, y ora cu bo ta stima Aruba di e forma aki, y bo ta stima partido MEP di e forma aki, bo ta pone interes general prome cu tur cos, hasta preferencia individual pa number riba lista. Esey mi ta gosa den e candidatonan di MEP. Mi ta sinti cu nos a traha e lista campeon, e unico alternativa pa e eleccion aki”, Evelyn Wever-Croes a duna di conose despues di entrega lista.