Home Uncategorized Minister Sevinger na Dia di Peru “E Gobierno aki a duna un...

Minister Sevinger na Dia di Peru “E Gobierno aki a duna un man na esnan cu a bin pa traha pa hiba Aruba dilanti”

SHARE

ORANJESTAD – Comunidad Peruano a bin hunto pa celebra su dia nacional na Paseo Herencia diabierna anochi. Minister di Integracion, Benny Sevinger, tabata presente na e ocasion aki pa felicita e comunidad Peruano cu su dia y gradici pa e contribucion cu semper a duna na e forsa laboral di Aruba y den e economia.

Prome Minister Mike Eman tambe tabata presente hunto cu su colega y a wordo bon ricibi door di e comunidad Peruano. “Boso ta parti di nos comunidad, di nos sociedad,” Sevinger a bisa. El a bisa cu por mira y sinti e contribucion di e Peruano den cada sector di e comunidad aki cu tur dia ta lucha pa un miho futuro pa e muchanan y e futuro generacion.

El a splica cu e Gobierno aki desde 2009 a pone e enfoke riba integracion. Esaki debi na e situacion di antes unda cu no tabatin un maneho humano, unda cu e hendenan no tabata haya permiso y miles di ciudadano tabata wordo deporta. “Pero awe tin un Gobierno humano, unda cu hunto ta traha pa e isla aki bay dilanti.” El a bisa cu Gobierno ta saca un man pa tur esnan cu kier biba na Aruba den harmonia, pa traha pa e futuro generacion.”

Celebrando Dia di Peru, el a pidi pa uni pa sigui dilanti como un solo nacion, cu tur esnan cu a yega aki pa colabora, contribui y integra pa crea un miho sociedad.