Home Uncategorized Desde 2011 a cuminsa cu plannan pa e renobacion y expansion di...

Desde 2011 a cuminsa cu plannan pa e renobacion y expansion di e edificio di Hospital SOGA orguyoso di ta parti di e proyecto di mas grandi na Aruba di e ultimo añanan

SHARE
????????????????????????????????????

A financia, diseña, construi y lo mantene e edificionan di Hospital pa 25 aña largo

 

ORANJESTAD, Aruba: Diahuebs atardi, den e entrada di e edificio nobo di Hospital, a tuma luga entrega di yabinan di edificio di e Hospital nobo, e asina yama “New Bed Tower”, incluyendo entrega di e Central Energy Plant y di un Magazijn Central nobo. Tabata un atardi hopi exitoso, compaña pa partnernan y invitadonan special. E proyecto di renobacion y expansion di e edificio di hospital a inicia na aña 2011 y na final di e proyecto aki, nos lo tin un di e miho hospital den Caribe. Tur presente a brinda pa e logro aki y tabata contento cu por a entrega un parti di e proyecto, considera como e proyecto di infrastructura di mas grandi na Aruba di e ultimo añanan.

 

Stichting Onroerend Goed Aruba a firma e acuerdo y a entrega e yabinan na Minister di Salud Publico, Cuido di Nos Grandinan y Deporte, Dr. Carlos “Alex” Schwengle. Presidente di SOGA, John Hodgson a indica cu tur hende tabata contento pa cu esaki. E hospital nobo di Aruba sin duda lo ta esun di mas bunita den region y mas aleu cu e region. “Como Arubiano nos tur mester ta contento cu esey, pasobra ami ta hopi contento di e manera e construccion ta bayendo”, John Hodgson a expresa contento.

 

Na aña 2011, SOGA a cera contracto cu e arkitecto, Bermello Ajamil & Partners, cu a diseña e hospital despues cu e compania a reuni continuamente cu e staf di hospital y cu representantenan di Gobierno, unda cu hunto a yega na e plannan final. Despues cu a firma e contract cu e contratista, den luna di November 2014 a cuminsa cu construccion di e ‘Medical Office Building‘, e ‘Central Energy Plan’, e Magazijn nobo y e ‘New Bed Tower’. A traha e edificionan ariba menciona den e casi 3 añanan di construccion. A entrega e Medical Office Building na December 2016  y awo ta den e etapa cu Hospital lo ocupa e edificio nobo di “ New Bed Tower”.

 

Tur sistema ta poni na nan luga, ta instalando tur ekipo medico, a instala tur sistema electrico y mecanico pe edificio nobo di New Bed Tower. Hospital lo drenta den e New Bed Tower den e proximo 30 pa 60 dianan asina cu Hospital caba cu nan trabou, Bernard Horovitz e ingeniero di Bermello, Ajamil & Partners a expresa. “Semper e ta un bon sentimento ora a pasa hopi tempo trahando riba e diseño, reuni cu empleadonan, haya tur hende di acuerdo cu e plan y percura pa termina cu e construccion pa pashentnan por uza”, ingeniero Horovitz a expresa contento.

 

Director di AIB Bank, Frendsel Giel, ta orguyoso di e proyecto y di e entrega parcial di e edificio nobo. Ainda tin cu termina cu piso 5 pa asina pone e ICU den dje, pasobra e ta den e parti di Intensive Care/Medium Care completamente nobo. “Mi ta contento con e atardi a cana. Finalmente ora mi a tende tur speech, bo ta keda satisfecho cu tur hende tin un solo meta”, Frendsel Giel a expresa orguyoso.

 

E meta ta pa entrega un producto cu ta di balor agrega pa Aruba. AIB ta contento pa cu esaki y di a forma parti, tambe orguyoso di e teamnan cu ta envolvi pa realisa e proyecto aki. Hospital mes a fiha e normanan con nan kier mira e hospital nobo. Tabatin hopi interes y e desafio tabata pa tene tur hende hunto pa enfoca riba e producto final y pa entreg’e den e tempo stipula y den e presupuesto.

 

AIB a gradici Gobierno y pueblo cu a duna nan e oportunidad pa realisa e proyecto aki. Desde inicio tabatin reserva riba esaki pero asina mes a tum’e y realisa e proyecto. Frendsel Giel a gradici AIB pa por a yega asina leu y tambe a gradici SOGA pa duna nan e confiansa pa encabesa e proyecto. Tambe a gradici tur partner envolvi pa duna nan e sosten totalmente.