Home Uncategorized Miembro di Directiva di Hospital, Drs. Theo de Kool Hospital contento y...

Miembro di Directiva di Hospital, Drs. Theo de Kool Hospital contento y cla pe era nobo Personal medico mester conoce e edificio completo y siña traha cu aparatonan nobo

SHARE

ORANJESTAD, Aruba: Diahuebs atardi SOGA a entrega e yabi di e New Bed Tower na Minister di Salud Publico, Cuido di Nos Grandinan y Deporte, Dr. Carlos “Alex” Schwengle. Tur partido envolvi cu e proyecto aki a percura pe proyecto cana manera mester ta aunke cu tabatin hopi reto cun’e. “Mi ta hopi contento di por mira, cu e edificio mas importante di e proyecto grandi aki, esta e New Bed Tower ta cla y a keda entrega na e pais”, asina Drs. Theo de Kool, miembro di directiva di hospital a duna di conoce.

 

E no tabata facil pasobra nan a experencia varios contratiempo pero como un team a traha hunto pa yega na e meta final. Tur a participa y duna di nan mes pa esaki por a bira un realidad. Hospital kier a gradici SOGA cu a percura pa e financiamento traha y door di nan esaki a bira un realidad. Tambe a gradici Gobierno, Minister Raad, Parlamento cu a aproba e proyecto aki. Gobierno a pone nan confiansa den hospital pa e proyecto aki y pa cu esaki mester gradici nan. “Mi kier a gradici Minister di Salubridad, Cuido di Nos Grandinan y Deporte aunke cu e secuencia aki lo ta diferente pa loke ta e proyecto aki mirando cu e lo mester ta Sport pa por cumpli cu un proyecto di e magnitud aki, sigui  pa e cuido di grandinan pa e motibo cu un proyecto di e magnitud aki por duna bo cabey blanco y na final ta yega na Salubridad cu loke nos di Hospital kier bay brinda y manera semper teniendo e pashent central”, asina Drs. de Kool a menciona.

 

Hospital ta spera di muy pronto por ricibi e yabi di e porta pa asina por cuminsa cu e trabounan.

Dentro di algun siman e personal medico di hospital lo bay den e New Bed Tower pa asina cuminsa siña conoce e edificio full y siña traha cu e aparatonan nobo. Casi tur aparato den e edificio ta nobo y ora di situacion di emergencia, nan lo mester sa di biaha unda tur cos ta. Tur e cosnan aki nan lo bay train y test diferente situacion, pa asina dentro den algun siman nan por atende e prome pashentnan den un edificio nobo y cu un top servicio manera ta custumber.  

E parti grandi di e proyecto aki tabata e prome fase cu tabata e edificionan nobo cu ta e Medical Office Building y awo ta bay cuminsa cu e di dos fase cual ta e renobacion completo di e edificio actual di hospital. Haciendo e renobacion aki, e edificio lo ta uno completamente nobo tanto paden como pafo.