Home Uncategorized Hipólito “Eddy” Ras Crea y logra oportunidad igual den enseñansa lo...

Hipólito “Eddy” Ras Crea y logra oportunidad igual den enseñansa lo bay tin efecto positivo cu ta mehora productividad laboral

SHARE

Tanto CFT y IMF a señala den nan rapport cu un di e retonan structural cu Aruba tin su dilanti, ta e situacion cu e productividad laboral ta abou. Productividad laboral ta con efectivo empleadonan ta presteer. Por ehempel tin un proyecto cu mester wordo ehecuta den un periodo di 4 luna, y por dicidi di bay hasi uzo di 5 of 10 empleado. Door di hasi uzo di menos empleado (dus 5 den e ehempel aki) e productividad ta grandi, pa e motibo cu menos empleado lo hasi e trabou enbez di hasi uzo di mas empleado. Otro manera di midi e productividad laboral ta si hasi uzo di mas empleado y e proyecto lo termina den un periodo mas cortico. Den e ehempel menciona esey nifica, haci e projecto cu 10 empleado pero enbez di termina e projecto den 4 luna, ta termin’ e den 2 luna di tempo.

Un di e factornan cu tin influencia pa mehora productividad laboral ta enseñansa. Enseñansa tin influencia riba productividad laboral, como cu un empleado cu tin bon conocimiento riba su materia lo presteer optimal. Aunke cu enseñansa na Aruba conoce su limitacionan mester percura pa por ofrese tur locual cu por y cu e mihor calidad. Cu limitacion ta wordo comprendi cu no ta tur opleiding tin na Aruba (p.e. scheepvaart, luchtvaart,enz) y momento di sigui studia, hopi hobennan mester sigui un estudio avansa den exterior.

 

Momento cu ta bay traha riba e topico enseñansa, mester evalua ki oportunidadnan enseñansa mester por ofrese pa keda mehora productividad laboral. Tres punto cu ta hunga un rol grandi entre e relacion di enseñansa y productividad laboral ta:

  1. “Scholing”. Momento cu empleadonan ta bon educa nan productividad laboral lo ta halto. Aki ta unda cu calidad ta di suma importante. E calidad ta percura cu un alumno ta domina e materia optimal. Door di domina su materia optimal e por funciona den su trabou na un manera optimal.
  2. “Bijscholing”. Bijscholing ta brinda oportunidad pa cuidadanonan keda desaroya nan mes pa asina nan no cay atras segun nan trabou ta desaroya. Y tambe crea oportunidad pa es nan cu pa un motibo of otro no a haya oportunidad pa sigui un opleiding.
  3. “Herscholing”. Un persona cu a sigui un opleiding cu no ta pas cu su persona, lo no duna productividad optimal cu consecuensia cu su productividad laboral lo keda cada bez bira menos. Y pa es motibo mester tin e oportunidad pa e haya chens di sigui un otro opleiding cu e ta sinti cu ta pas mas cu su personalidad.

 

Mehora productividad laboral tin su beneficionan pero tambe e ta trese su retonan. E beneficio di un miho productividad laboral unda cu companianan por funciona optimal cu menos empleado, ta crea cu e companianan tin e flexibilidad di ofrese un miho salario pa por sigui competi. Empleadonan cu tin un miho salario ta contribui mas cu economia di Aruba. E reto cu empleadonan tin miho productividad laboral ta trese cu lo bay tin mester di mas empleo. Como cu mehora productividad laboral ta hasi cu compania por drei cu menos empleado, ta hasi cu si no crea empleo lo tin como consecuencianan cu un grupo di habitante lo ta desemplea. Pa crea mas empleo cu miho salario y cu ta brinda mas variacion den profesion, POR lo ehecuta den e siguiente gobernacion:

  1. Expande turismo  pa medio di fast ferry entre e islanan Aruba, Corsou y Boneiro.
  2. Introduci pilar economico nobo cu ta e curason di Fourth Industrial Revolution.

 

E pilar economico nobo lo ta enfocando riba companianan high tech, E-business, startups, business incubators, companianan fintech y otro actividadnan economico innovativo basa riba tecnologia nobo

Pa ta atractivo pa introduci un pilar economico nobo lo:

  1. Introduci incentivonan fiscal.
  2. Stimula creacion di un fondo di inversion.
  3. Brinda e infrastructura necesario cu e meta pa desaroya un sector economico nobo.

 

Pa crea y logra oportunidad igual pa tur alumno, mester hasi enseñansa accesibel pa un y tur. Pa es motibo POR lo introduci enseñansa cu ta wordo subsidia pa gobierno, completamente gratis. Tanto pa e alumnonan di scol preparatorio, scol basico y scol secundario.