Saliendo tur dia for di Fort Lauderdale entrante 8 di maart 2018
ORANJESTAD – SouthWest Airlines ta anuncia cu, cuminsando dia 8 di maart 2018, nan lo cambia nan vuelo diario entre nos isla y Orlando, pa uno entre Aruba y Fort Lauderdale. Pa Aruba Tourism Authority (ATA) esaki ta un cambio masha positivo mirando cu e posibilidadnan di conexion cu otro mercadonan clave di Merca, incluyendo Newark (noordoost di Merca), ta hopi mas amplio, cu for di Orlando. E ciudad na e costa noordoost di Florida ta representa e oportunidad di por ofrece Aruba como un destino turistico accesibel pa miyones di persona na diferente mercado nobo, cu tin hopi cliente fiel na Southwest. Sigur un otro oportunidad pa por sigui aumenta e cantidad di bishitantenan cu nos ta ricibi for di Merca.
Esfuerzonan continuo di parti di Aruba Tourism Authority y Aruba Airport Authority, hunto cu otro socionan clave den e industria aereo a percura pa un relacion fructifero cu e aerolinea Mericano Southwest. E vuelo inaugural di e aerolinea aki pa Aruba a tuma luga tres aña pasa, bek na juli 2014 cual tabata, por cierto, Southwest Airlines su prome vuelo internacional. For di e tempo ey e cooperacion a crece.
E vuelo diario di Southwest entre Aruba y Fort Lauderdale tin un capacidad di 143 pasahero riba un avion Boeing 737. E Southwest concourse nobo y renobacion di Terminal 1 cu ta consisti di 5 gate, ta parti di un renobacion masivo di Hollywood International Airport cu ta programa pa keda cla na 2020, aunke ya caba e aerolinea a realisa un ‘sneak peek’ na juni ultimo. Pasashinan pa e vuelo nobo di Southwest Fort Lauderdale-Aruba a cuminsa wordo bendi caba online por medio di nan website oficial.
Aruba Tourism Authority hunto cu entre otro Aruba Airport Authority lo keda enfoca su esfuerzonan riba e mantencion di relacionnan cu socionan clave aki den industria aereo, mescos cu ta e caso tambe cu e sector hotelero, crucero, operadornan di tour, y demas, pa asina alcansa e metanan cu e entidad tin fiha pa su mes cu e obhetivo di diversifica y fortalece turismo di nos isla.