Home Uncategorized NV ELMAR cabando cu proyecto di luznan LED Di 9.000 luz awor...

NV ELMAR cabando cu proyecto di luznan LED Di 9.000 luz awor cayanan di Aruba ta conta cu 12.000 luznan LED

SHARE
????????????????????????????????????

ORANJESTAD, Aruba: “Ta un trabou duro e ekipo special aki forma pa mas o menos 15 empleado a logra pa nos e ultimo añanan aki. Mi ta masha orguyoso di nan”, asina Ing. Robert Henriquez, director di NV Elmar a duna di conoce diabierna ultimo. Tabata un bon momento pa conta cu entretanto a instala no menos di 10 mil luznan LED rond di nos isla caba y cu falta solamente 2 mil mas pa instala. Eseynan den su mayoria ta esunnan color oraño cu ta uza na crusada y rotondenan.

 

Ing. Robert Henriquez ta corda ainda con a cuminsa cu e proyecto aki poco poco na aña 2013 pero cu desde 2015 a intensivo e proyecto den forma mas rapido y mas eficiente. Ta uza dos ekipo di 5 empleado cu ta bay riba caya y pasa palo di luz pa palo di luz pa reemplasa e bombionan bieu cu e luznan modelo LED nobo aki. Paden tin un otro 5 empleado mas, incluyendo e ingenieronan cu ta planea e trabounan den forma adelanta.

 

Ora papia di luznan LED, mester pensa mesora riba un modelo cu ta traha hopi mas eficiente, specialmente den uzo di coriente. Separa di e eficiencia, e ta brinda hopi mas iluminacion tambe compara cu e sistema anticua. Gobierno a informa NV Elmar cu no ta e intencion di spaar riba uzo di coriente, pues locual a spaar na uzo, NV Elmar a opta pa amplia e cantidad di luznan cu no menos di 3 mil extra!

 

“Anualmente nos ta inverti hopi den mantencion y mehoracion di nos red di distribucion di coriente. Ultimo añanan nos ta enfocando mas y mas riba modernisacion di nos sistemanan y pa ta mas eficiente den uzo di coriente y productonan”, asina Ing. Robert Henriquez a duna di conoce. “Nos ta promove eficiencia bou nos clientenan, pues nos tambe ta duna e bon ehempel di cambia e luznan di caya pa e modelo aki di LED. E ta un proyecto cu a costa nos 12 miyon florin”, di acuerdo cu e director di NV Elmar.

 

N.V. ELMAR a celebra 66 aña di existencia na november 2016 y ta conta cu un total di 165 empleado den servicio directo di e compania. Siendo nos compania nacional distribuido di coriente, N.V. ELMAR ta inverti alrededor di 20 miyon florin tur aña den mantencion y actualisacion di su red di electricidad. Cu lansamento di servicio y productonan nobo, ta demostra cu no ta dedica atencion solamente na aspectonan tecnico y di infrastructura, sino tambe na e nivel di servicio eficiente y moderno cu ta brinda clientenan diariamente.