Home Uncategorized Candidato di AVP Michael Lampe “Ban para hunto pa e progreso di...

Candidato di AVP Michael Lampe “Ban para hunto pa e progreso di Aruba por continua”

SHARE
????????????????????????????????????

ORANJESTAD – Esaki tabata e mensahe cu otro candidato hoben di AVP Michael Lampe a expresa diabierna ultimo na momento cu Green Square a habri oficialmente como e area unda hobennan por acudi cerca e candidatonan hoben di AVP. Eynan diferente actividad ta bay tuma luga den e temporada di campaña. 

Diabierna anochi Lampe a cuminsa su discurso bisando: “Awe nochi mi no a subi scenario pa canta pero awe mi ta aki cu boso pa para pa boso deseonan.” El a corda cu ta casi un siman pasa cu el a wordo lansa y den e siman cu a transcuri, e no por catalog’e otro cu un siman yena cu emocion, yena cu positivismo, yena cu energia “pa para cu boso p’asina nos sigui bay dilanti”.

Michael Lampe ta conoci como un persona cu ta traha riba tereno di cultura y p’e cultura y educacion ta un base fuerte pa progreso y un cultura bibo ta un cultura cu ta keda educa y innova su mes. “Nos isla Aruba constantemente tin cu keda innova, no solamente atrabes di tecnologia, pero tambe con nos ta pensa, e manera con nos ta educa nos mes y con nos ta crece den bida. Awenochi nos ta para aki hunto, y mi ta sumamente contento pa wak cuanto talento ta subi escenario awe nochi.  Un diversidad, rikesa cu ta aporta na nos cultura musical. Riba Aruba nos tin hopi talento y creatividad, profesionalnan hoben cu tin e espirito bibo y futuro ta biba den nan. Pesey nos kier ta hunto, sigui padilanti cu e progreso, crea oportunidad p’asina nos tur por bay dilanti.”

El a recorda cu tempo cu e tabata bay scol, e ta subi un bus for di Savaneta pa San Nicolas y awo e ta realisa cu esey tabata e bus di progreso, e transporte pa su futuro, pa su educacion. “Awe ami cu mi team a traha duro. Eytras tin un bus traha cu no tabata wordo uza y awo el a haya un destinacion nobo. Un destinacion pa innova y educa nos cultura. No solamente e ta bay ta mi oficina, pues cualkier momento boso por pasa aki y nos lo tey den e bus. Pero tambe e ta un luga unda despues di awe nos tur por bini hunto, combersa y inspira otro. Pesey mes Aruba awe oficialmente nos ta habri e Green Square y riba dje e bus di progreso.”

Pa finalisa su discurso, el a bisa un biaha mas cu e ta para banda di e ciudadanonan di Aruba “paso nos sa cu para hunto, cu nos diferencianan, cu nos deseonan, cu nos soñonan, cu nos amor, cu nos partido AVP, nos ta uni y cla pa sigui cu e progreso di nos pais. Pesey mes mi kier a bisa awe, ami ta Aruba, abo ta Aruba y hunto nos ta Aruba. Hunto nos ta AVP. Green Square. Berd’e ta.”