Home Uncategorized Parlamentario mr. Xiomara Maduro: A gasta placa na tram y awe...

Parlamentario mr. Xiomara Maduro: A gasta placa na tram y awe no tin cupo na mavo

SHARE

Nos a tuma nota di e comunicado di prensa di SKOA den cual ta mustra riba e scarsedad di cupo pa studiante na e schoolnan di MAVO na nos Pais. Esaki ta un noticia preocupante pasobra e ta significa cu algun hoben lo wordo limita den e chens pa sigi estudio mas avansa. E scarsedad aki ta e consecuencia directo tambe di e prioridadnan robes y e mal maneho di Gabinete Eman. Pasobra si awe e school di HAVO VWO na Noord tabata un hecho, kizas nos no mester a tende un noticia asina alarmante di SKOA cu no tin cupo na schoolnan di MAVO. E mal move di Gabinete Eman pa a sinta gasta e placa na tram ta pone cu awe no tin cupo pa studiante na schoolnan di MAVO.

 

Placa di FDA pa school na Noord

Manera cu Gabinete Eman a yega na mando nan a pone man riba e 29 miyon di fondo di FDA cu tabata destina pa traha e school di HAVO VWO na Noord. Tur cos tabata practicamente cla pa e school bira un realidad, pero Minister Eman a pidi Hulanda pa bay di acuerdo pa cambia destino di e placa pa e school pa destine na embeyesimento di Oranjestad. Y pa awor tur hende sa cu nan a usa e placa aki pa cumpra tram.

 

Colegio ta subi drempel y MAVO ta yena

Claro na momento cu bo keda sin construi un school mas pa HAVO VWO na nos Pais, bo ta pone un precion mas grandi riba Colegio Arubano cu ta ofrece educacion riba e nivel ey. Colegio su infrastructura tambe ta limita y no ta nada stranio cu bou e precion di falta di suficiente cupo ta subi nan drempel pa hoben por drenta nan school. Esaki ta pone un precion mas grandi riba e schoolnan di MAVO cu ta yena tambe cu studiantenan cu no ta logra drenta Colegio.

 

Placa pa school den saco di sostenedor di AVP

Largo tempo Ministernan Eman y Sevinger a sinta gaña cu nan lo construi e MAVO HAVO of HAVO VWO school na Noord. Pero nan no a cumpli. Nan a usa e fondonan pa paga fabornan na esnan tras di e companianan cu a keda encarga cu e trabounan den Caya Betico Croes. Asina placa di FDA destina pa e school di HAVO VWO na Noord a bay den saco di sostenedor di AVP perhudicando nos hobennan den nan cupo di estudio.

 

E school HAVO VWO ta un prioridad

Nos di MEP lo percura pa como sea e school di HAVO VWO na Noord bira un realidad. E school aki ta un prioridad. Si e gobierno actual a realisa e school aki na 2010 caba, awor aki ya lo tabata tin hoben gradua. Nos no por sigi perde mas tempo y laga nos hobennan wordo perhudica pa falta di cupo na school. Ban bisa no na e prioridadnan robes y e mal gobernacion di AVP y ban hunto pa logra e cambio cu educacion na nos Pais tambe merece.