Home » Parlamentario mr. Juan Ady Thijsen(MEP): Definitivamente Mike Eman no a traha riba progreso

Parlamentario mr. Juan Ady Thijsen(MEP): Definitivamente Mike Eman no a traha riba progreso

by sxm
0 comment 57 views

Parlamentario mr. Juan Ady Thijsen a tuma nota di un declaracion di Mike Eman unda Mike Eman mes ta reconoce cu e no a traha riba progreso y ta awor e ta bai traha riba progreso. Segun Mike Eman bo tin cu acopla aspectonan financiero, economico y tecnologico pa yega na e progreso. Esaki segun Parlamentario mr. Juan Ady Thijsen ta tipifica un diferencia grandi entre partido MEP y partido AVP. Mike Eman ningun momento ta inclui den progreso e parti social mientras MEP como partido social democrata tin e aspecto social como punto central, pues segun MEP no por papia di progreso si no tin desaroyo social tambe.

Tampoco Mike Eman ta inclui e aspecto di medio ambiente y naturalesa den su definicion di progreso. Partido MEP si ta kere cu progreso no por bai cu destruccion di medio ambiente. Segun Parlamentario mr. Juan Ady Thijsen si bo wak con Mike Eman ta defini progreso y bo wak con Mike Eman a goberna nos pais e ultimo 8 anjanan bo ta compronde con tur su esfuerzonan a bai den beton, cement, asfalt y brug.  Segun Parlamentario mr. Juan Ady Thijsen Mike Eman a faya hasta su mesun definicion di progreso.

E economia di Aruba no a conoce progreso, comercio ta den problema, hopi negoshi a cera y otronan ta luchando pa sobrevivi. E clase trahado a sufri durante gobernacion di AVP. Hopi a perde trabao y poder di compra a bai atras. Mike Eman ta broma cu su pepitanan di mainshi cu e ta strooi lew a lew manera e reparatietoeslag pero eseynan no ta yuda. Ariba tereno financiero gobierno di Mike Eman tambe a haci un desaster no solamente creando debe den presente pero tambe pa den futuro cu ta cubri un periodo di 30 anja. Salud di bo cuidadanonan tambe ta importante si bo kier papia di progreso y Mike Eman no a traha riba esaki, a renoba si pero atrobe den cement y beton. Nada di inversion den makinaria y personal na hospital. Ironia di bida ta cu e partido green cu ta promove green a resulta e pio enemigo cu naturalesa a yega di conoce na Aruba.

Parlamentario mr. Juan Ady Thijsen ta pidi pueblo pa tuma nota cu Mike Eman y AVP ta brindabo un progreso defini na aspectonan financiero economico y tecnico mientras MEP ta ofrece bo un progreso amplio den e sentido di e palabra incluyendo aspectonan social, di medio ambiente, di ensejansa, salud y hasta trankilidad di seguridad personal locual AVP no a haci lagando e criminalidad tin e pueblo bibando den angustia. Segun Parlamentario mr. Juan Ady Thijsen si bo kier progreso real vota MEP hunto p’e cambio sin miedo.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio