Home Uncategorized Doñonan di trucknan a blokea e rotonde den construccion na Cumana, causando...

Doñonan di trucknan a blokea e rotonde den construccion na Cumana, causando un chaos completo

SHARE

Cumana: Diabierna pa mas o menos 4’or y mey, e rotonde den construccion na Cumana ta wordo blokea den tur direccion pa varios doño di Heavy Equipmentnan, mesora causando un chaos completo den trafico. Varios unidad di polis a wordo manda na e rotonde y despues di un rato no a keda polis nada otro di desvia e trafico mandandonan pa rutanan alternativo.

 
Na e sitio enberdad tabata tin un cantidad grandi di trucknan cu tabata tin e rotonde completamente blokea, e truckdrivernan tabata mustra hopi rabia, despues cu a yega na nan orea, cu un compania stranjero lo bay construi e caminda y e rotonde aki, aparentemente lo ta trata di un compania portuges, cu segun un di e truckdrivernan presente lo a haya e proyecto aki. 
 
E truckdriver a sigui splica cu awe tur e heavy equipmentnan di e compania stranjero a yega Aruba y segun nan, e heavy equipmentnan aki lo ta procedente di Peru y lo drenta Aruba sin mester di paga invoerrechten. Ela sigui bisa cu e compania lo a bin cu un cantidad grandi di nan mesun trahadornan di afo. Tambe ela bisa, cu e compania lo bay importa Diesel for di exterior pa ehecuta e trabounan na e caminda y e rotonde. 
 
E grupo di truckdriver a splica cu nan si mester a paga invoerrechten riba nan trucknan y nan si mester contribui na caha di gobierno, mientras cu e compania aki cu ta bin traha e caminda no lo contribui na caha di gobierno manera nan ta haciendo, e compania aki ta kitando nan pan di cada dia y cu aparentemente Gobierno ta haci manera na Aruba no tin hende capacita of suficiente truck pa haci e trabounan aki.  E truckdrivernan nan disgusto ta basta grandi y ta sinti cu nan a wordo menosprecia y laga na caya. 
 
No ta conoci pa cuanto rato nan lo keda den accion y si nan lo bay intensifica nan accion, pero nan ta mustra dicidido.