ORANJESTAD – Dialuna mainta, Minister di Finanzas, Angel Bermudez a entrega concepto di e cuenta anual 2016 na Contraloria General. Segun e mandatario a base di lo cual a keda entrega ta mustra cu a logra mantene e deficit na 1.7% cu ta bou di e standard rekeri pa e ley di supervision Laft.
Segun splicacion di e mandatario, pa aña 2016 e standard di e deficit tabata registra na 2%, y un bes mas ta logra keda bou di e cifra stipula. “Nos a entrega nos splicacion di con e presupuesto 2016 a wordo ehecuta y awor nos lo laga nos contraloria general haci su evaluacion di e cuenta anual aki y dentro di algun luna nos lo ricibi nan rapport cu observacion”, asina Minister Bermudez a indica.
Den e transcurso di e proximo 8 pa 10 siman contraloria general lo haci nan evaluacion y investigacion riba e rapport aki y consecuentemente lo entrega un reportahe final cu nan observacionnan. “Mi ta spera cu pa ora Parlamento bin bek di recess, nos por entrega e cuenta anual un biaha mas na tempo, manera ley stipula y cera henter e procedura di presupuesto di 2016 cu aprobacion di nos cuenta anual den Parlamento prome cu fin di aña,” e mandatario a expresa.