Home Uncategorized Lider di MEP, Evelyn Wever-Croes: Nos solucionnan pa enseñansa: MAS graduado y...

Lider di MEP, Evelyn Wever-Croes: Nos solucionnan pa enseñansa: MAS graduado y MENOS drop outs!

SHARE

ORANJESTAD – Enseñansa ta un punto hopi importante pa partido MEP. E solucion pa tur e problemanan di nos pais ta enseñansa y salud. Pasobra sin enseñansa y sin salud nos no tin nada. Lamentablemente enseñansa a wordo neglisha hopi den e ultimo añanan. No tabata tin innovacion den enseñansa, falta material, falta maestro, y e opcionnan di estudio ta limita.

 

SOLUCIONNAN DI MEP:

 

Mehora calidad y nivel di enseñansa

MEP lo percura pa actualisa e maneho di idioma y curriculum, p’asina nos eleva e calidad di enseñansa. MEP lo trece innovacion y digitalisacion di enseñansa y mihor material di enseñansa.

Un otro punto importante ta cu nos mester haci enseñansa accesibel pa tur hende, pa evita cu ora mayornan no por sigui paga scol of buki pa nan yiunan, e yiunan stop di bay scol.

MEP lo percura pa introduci ambachts school pa prepara studiantenan di nivel LBO mesora pa Mercado laboral. Tambe lo percura pa e estudionan di MBO, HBO y WO, ta sincronisa cu e necesidad riba nos mercado laboral, ya tanto EPI, IPA y Universidad ta deliver studiantenan cu por haya trabou mesora na Aruba mes. Y lo inverti den enseñansa pa adulto.

Pa stimula nos hobennan sigui estudionan den exterior, MEP lo introduci e posibilidad di fiansa di estudio sin interes pa nos hobennan cu bay studia den exterior, por bolbe Aruba bek.

 

Docentenan

Docentenan mester haya mas sosten den forma di klasse assistenten y trahador social p’asina e problemanan social di nos muchanan wordo atendi pa profesionalnan y asina e docentenan dedica nan mes na duna les.

MEP lo percura tambe pa duna mas participacion na docentenan den decisionnan importante di enseñansa. Ta nos docentenan sa kico ta come y bebe den enseñansa, y p’esey mester duna nos docentenan e participacion mas grandi.

 

Infrastructura

Meta primordial di MEP ta pa renoba, amplia y construi mas scol, pa percura pa nos tin suficiente scolnan pa tur studiante. Pa esaki lo pone un fondo disponibel. Y e scol MAVO/HAVO/VWO na Noord lo bira un realidad!

 

“Locual cu nos kier mira ta un aumento den muchanan y hobennan cu ta pasa e aña escolar cu exito, un aumento di nos graduadonan riba tur nivel, y menos drop outs. Nos muchanan y hobennan no ta solamente e futuro di nos pais, nan ta e FUNDESHI di nos pais y ta nos deber di inverti den e fundeshi aki. MEP lo haci e fundeshi aki hopi mas solido”, segun Evelyn Wever-Croes, lider di MEP.