Home Uncategorized Minister Arends na inicio di e di dos fase di Watty Vos...

Minister Arends na inicio di e di dos fase di Watty Vos Boulevard “Obviamente e proyecto aki ta simbolisa e era nobo di desaroyo economico di Aruba”

SHARE

ORANJESTAD – E siman aki e proyecto Watty Vos Boulevard a start den forma festivo. Un proyecto cu ta bay tin un impacto economico grandi pa pais Aruba. Na e ocasion aki, Ministernan Eman, Sevinger y Arends a hiba palabra, mescos tambe partnernan strategico den sector priva. E proyecto aki ta bay percura pa e fluho di trafico cana miho ya cu Aruba su cantidad di auto a triplifica den e ultimo 25 añanan y un ‘ringweg’ di e embergadura aki ta un necesidad grandi. Minister di Asuntonan Economico Richard Arends den su discurso a amplia riba e desaroyo economico cu un proyecto asina tin pa Aruba.

Minister Arends: “Awe ta marca un dia hopi importante. No solamente nos ta inicia e proyecto infrastructural mas grandi cu nos a yega di conoce durante e ultimo 30 añanan, pero awe nos tur por ta testigo di un vision cu a nace na 2010 ora Gabinete Mike Eman I a crea un programa di infrastructura, di inversionnan den areanan publico como tambe energia. Tur esaki no a sirbi solamente pa ‘jumpstart’ e economia y sali di e crisis economico reinante, pero tambe e tabata un inversion grandi den forsa laboral, den poder di compra di e ciudadano.” Minister Arends a enfatisa e importancia di productividad di nos infrastructura den liña di e metanan di desaroyo sostenibel di Nacionan Uni unda cu despues di a inicia e proyecto luna pasa, awe a cuminsa cu construccion di e prome rotonde cu lo conecta dos area di e isla loke ta un alivio bahando e congestiamento y trece beneficionan pa tur esnan cu ta participa den nos economia.

“Obviamente e proyecto aki ta simbolisa e era nobo di desaroyo economico di Aruba. Algun aña pasa tempo mi tabata Presidente di FESCA, awe ta carga nomber di dr. Mito Croes, nos a yega na e conclusion cu bo por tin un desaroyo economico sostenibel solamente si bo calidad di infrastructura, calidad di bida, calidad di areanan publico ta den balansa cu otro.” Arends a mustra riba e hecho cu e superficie di nos infrastructura,no a desaroya su mes conforme e desaroyo economico cu nos a conoce durante e ultimo 30 añanan ni tampoco conforme e cantidad di auto. Esaki ta nifica cu tabatin un espacio hopi grandi pa haci mehoracionnan necesario y amplia e cantidad di caminda pa autonan por core.” El a bisa cu aparte di esaki a inverti tambe den turismo y grandemente den rehabilitacion di e refineria. Cu e dos pilarnan economico aki cu ta solido y cla pa afronta e desaroyonan nobo, infrastructura y areanan publico como e di tres pilar ta forma e simbolo tambe pa diversificacion di economia di Aruba.

Arends a amplia riba e cinco areanan fisico cu ta consecuencia di e trabounan infrastructural grandi . Nan ta e areanan rond di refineria, rond waf di Barcadera, rond di hospital, rond di e waf bieu di carga y e di cinco ta esnan rond di e obranan infrastructural . Tur esaki ta fuente pa desaroyo economico nobo promoviendo asina tecnologianan limpi, companianan mediano y chikito, exportacion di conocemento, actividad local como tambe mercado local.

“No ta keda mi nada otro di gradici y felicita minister Sevinger pa su empeño y sigur Prome Minister Eman pasobra cu e proyecto aki ta resultado di su bishitanan diario na cada ministerio, reunionnan semanalmente cu e tabata hiba pa por tin tur partido riba e mesun liña pa awe nos por ta para aki y ta testigo di e di dos fase di e rotonde na Cumana di Watty Vos Boulevard.”