Home Uncategorized Bureau MFA a presenta charla conhuntamente cu Club Kibrahacha 60+

Bureau MFA a presenta charla conhuntamente cu Club Kibrahacha 60+

SHARE

ORANJESTAD – Bureau MFA conhuntamente cu Club Kibrahacha 60+ a organisa un charla encuanto e tema ‘Tecnologia Moderno’ pa nos grandinan na MFA Paradera y MFA Noord. E oradornan invita pa e sesion aki tabata sr. Evan Giel di Setar N.V., sr. Edward Erasmus di Free Zone Aruba y sr. Jeffrey Matos di Club Kibrahacha 60+.

Durante e charla e expertonan a duna splicacion di e importancia pa sigui e cambionan cu lo facilita nos bida diario den e mundo di tecnologia. A duna splicacion entre otro di e diferente plataformanan di social media, manera Facebook y Whatsapp cu ta wordo uza diariamente como tambe aspectonan di diferente telefonnan. Esnan presente a haya chens di haci pregunta y tabata hopi interesa den e tema presenta.

Mision di Bureau MFA ta pa ofrece diferente servicio sea publico of priva mas efectivo y mas cerca di cas y tambe promove y facilita e participacion y interaccion social y cultural di e ciudadanonan den comunidad sea cu actividadnan educativo, recreativo y social/cultural pa tur edad. Pa e temporada di vakantie Bureau MFA ta organisando un serie di ‘Anochi di Cine’ pa mucha y mayornan. Keda pendiente pa mas informacion den e siguiente simannan.