Home Uncategorized Azriah Palm (ABO): Partido ABO si ta duna transparencia financiero y e...

Azriah Palm (ABO): Partido ABO si ta duna transparencia financiero y e bon ehempel

SHARE

Desde 2014, partido ABO ta bogando pa transparencia den politica. Transparencia den tur sentido. Un partido politico no por sconde informacion pa pueblo y sigur no su gobernantenan of parlamentarionan. Pero lamentablemente esaki ta e caso, pasobra e clase politico tradicional a percura pa e pueblo humilde no mag di cuestion’e y cu e tin cu acepta loke e politico bisa.

Cada aña na e apertura di e aña parlamentario, diferente miembro ta declara publicamente cu no tin transparencia den gobernacion. Regularmente miembronan di parlamento ta declara cu transparencia ta esencial pa bon gobernacion. Pero ora e toca pa e mesun politiconan aki duna transparencia financiero y e bon ehempel, tur ta core of bay sconde. Tur ta keda practica e dicho di ‘scucha mi palabranan, pero no mira mi actonan’.

Pa falta di transparencia financiero, tin politiconan cu a drenta politica cu 10 florin den nan saco, pero awendia ta miyonario. Pa falta di transparencia financiero, tin politiconan cu ta hibando campañanan miyonario, pero ta poco ta tribi di puntra di unda e placa pa esakinan ta sali. Pa falta di transparencia financiero, ainda tin un parti di pueblo ta kere cu Aruba no ta bancarota y cu ta acepta e malgastamento di pueblo su placa pa enrikece e grupito privilegia como algo normal.

Den diferente comunicado, partido ABO a papia riba e tema aki y a ilustra cu e falta di transparencia financiero ta un di e causanan principal di e decadencia moral y social. Cu diferente partido a copia e mensahe aki pa probecho politico, partido ABO ta aplaudi y ta considera esaki como algo bon. Pasobra mas un pueblo sa di e consecuencia negativo di no duna transparencia financiero, mas lihe un pueblo culto por para esaki y scoge pa politiconan integro. Pero lamentabel pa constata cu tur e partidonan existente solamente ta uza e tema di transparencia ora e ta cumbini nan y como decoracion politico. A pesar di tur e palabranan bunita y promesanan di transparencia, te awe ningun partido politico a duna transparencia financiero!

Partido ABO no ta un partido di palabranan bunita so. Partido ABO ta demostrando semanalmente desde 2014 cu e ta un partido serio y di hecho. Na juli 2016, partido ABO a publica un articulo cu e titulo ‘Partido ABO no ta cumpra voto’, y desde diabierna 7 juli partido ABO a haci su relatonan financiero publico. E relatonan aki por wordo haya riba su website, www.aboaruba.org. Asina pueblo por mira exactamente cuanto participacion na e proceso democratico ta costa, di unda e fondonan ta bin y cu e no tin cu costa miyones na bandera, sticker, show y propaganda pa tapa pueblo su wowo. Tambe pueblo por mira cu tur e fondonan ta bini di donacion di pueblo mes y no comerciante. Nunca antes un partido politico a haci esaki boluntariamente. Partido ABO awor ta dunando e bon ehempel atrobe. Ban mira awo cua partido politico lo sigui. Spera cu esunnan cu lo sigui, duna tambe transparencia den e fundacionnan y companianan liga na e partido of politico cu ta pata pata cu placa y cu nan no ta bin gaña pueblo cu e fondonan ta bin di BBQ y rifa.

 

(www.aboaruba.org, aboaruba@hotmail.com)