Cu un parti di nos pueblo ta lubida lihe of tin un inmenso capacidad pa pordona, esey no por cambia nada di loke a pasa den pasado. Atrobe nos ta den un temporada di eleccion, y parce cu atrobe un parti di pueblo kier cera wowo pa asuntonan cu a causa hopi dolor den e sociedad pa via di mal maneho y manipulacion politico.
Mi ta sigur cu hopi hende a lubida kico a pasa awe 10 juli 1998. Riba e fecha aki, gobierno a firma un acuerdo pa ‘Aserca Airlines’ bira doño di ‘Air Aruba’. Durante e ceremonia aki, segun Diario, ‘Tur a accentua e importancia di e acuerdo aki pa e compania Air Aruba, pa turismo di Aruba y pa e trahadornan di Air Aruba’. Den practica, e acuerdo aki no a nifica mucho pa e compania nacional di aviacion, Aruba su turismo of su trahadonan. Segun algun hende, parce cu e unico cu a beneficia di e acuerdo aki, tabata ‘Aserca Airlines’. Pasobra no mucho tempo despues ‘Air Aruba’, e orguyo nacional, a wordo declara bancarota, mientras cu e doñonan di ‘Aserca Airlines’ a wordo declara como ‘persona non grata’, pa e mesun politiconan ‘amigo’. Pa hopi aña ‘Aserca Airlines’ no por a bula mas pa Aruba.
E ta bon pa nunca pueblo lubida e ehempel aki. Pasobra for di e caso di ‘Air Aruba’ algun les hopi importante por wordo siña. Den e añanan cu a sigui, Aruba a conoce varios compania di aviacion. Pero ningun di nan tabatin e imagen di ‘Air Aruba’ of e laso sentimental cu pueblo tabatin pa ‘Air Aruba’, siendo e prome compania di aviacion di pais Aruba. Hopi a lanta, pero casi tur a muri.
A pesar cu tur hende ta reconoce cu nos economia ta basa riba turismo, diferente gobierno a scoge pa subsidia otro companianan di aviacion enbes di uno local. Tambe diferente gobierno a para un banda sin haci nada, pensando cu e asunto di aviacion ta uno di sector priva so. Partido ABO no ta comparti e opinion aki. Un isla manera Aruba cu ta casi 100% dependiente di turismo, no por laga transporte di turista pa e isla, solamente den man di sector priva. Cu e mundo di aviacion ta uno complica y cu tin hopi competencia, esey nos ta reconoce. Pero si nos economia ta depende asina fuerte riba turismo, anto e ta logico cu Aruba no por depende solamente riba companianan di exterior pa e fluho di pasahero necesario. Paisnan cu un economia mas chikito cu esun di Aruba, tin nan propio compania di aviacion. E paisnan aki a comprende y a pone den practica e sabiduria bieu di nunca un pais mester ta 100% dependiente di un otro pa su desaroyo y bienestar. Den Caribe, paisnan manera Cayman Islands y St. Maarten tin nan propio compania di aviacion.
Den nos humilde opinion, Aruba tambe mester por tin su propio compania di aviacion nacional. Si tin un boluntad honesto y determinacion serio di parti di gobierno, enbes di uza e compania di aviacion pa solamente propaganda politico of transporte personal, esaki mester por ta posibel. E asunto di un compania nacional di aviacion ta un necesidad serio pa nos turismo y p’esey e mester haya tur atencion, sosten y apoyo. Esaki no kiermen cu un gobierno mester firma tur sorto di acuerdo di participacion anti-pueblo, acuerdonan dudoso of scoge atrobe pa un ‘amigo’, manera semper a sosode. Un gobierno tin cu sirbi e interes general y reconoce e balor di un compania di aviacion nacional. Un compania di aviacion nacional, tambe ta un simbolo di independencia!
(www.aboaruba.org, [email protected])