Awor cu ta tempo di campaña y nos ta para dilanti e responsabilidad pa scoge e rumbo cu nos kier pa nos Isla bai aden den e proximo 4 aña, bo por tende hopi discusion tocante ‘criminalidad ta halto’, ‘gasto di salubridad publico mester baha’, ‘economia ta stanca’, ‘Aruba no ta manera antes’ y mucho mas. Bo tabata sa cu si bo vota pa traha riba e derecho di nos muchanan, mayoria di e problemanan na Aruba por wordo soluciona? Pero esaki no ta rekeri solamente atencion y dedicacion di e gobernantenan cu lo guia nos pais, pero tambe e atencion y dedicacion di cada un di nos aki na Aruba.
Con lo logra esaki
Si na cas, na school of unda cu un mucha ta nos cuminsa dune e amor, atencion y respet cu e mester, nos lo cria un generacion nobo cu lo stima y balora nan mes mas y e lo tin mas compacion cu otro hende. Consecuentemente, esaki lo yuda baha abuso sexual, fisico y mental di muchanan drasticamente den futuro y lo yuda crea un generacion cu un autoestima halto cu no lo cay facilmente den droga, abuso di alcohol, problemanan mental y abuso di otronan. Esaki lo juda crea e sociedad di paz, unidad y hermandad cu nos tur awor ta anhela pa tin bek.
Alimentacion saludabel
Si nos cuminsa duna nos yiunan cuminda mas saludabel na cas y crea schoolnan saludabel di berdad, nos lo cria un generacion nobo di hendenan mas responsabel pa nan mesun salud y mas saludabel. Esaki lo yuda baha enormemente e gastonan di salubridad publico cu nos tur ta paga pe. Nos prima di AZV lo no mester sigui subi manera ta e caso awor pa cubri gastonan di salubridad publico cu ta keda crece exorbitantemente tur aña.
Norma, conducta y etica
Si nos introduci bek den nos casnan, nos schoolnan, nos organisacionnan y den nos gobierno e normanan di conducta y e balornan cu nos semper a haña importante den nos comunidad, nos lo wak un cambio positivo den e proximo generacionan, caminda nos muchanan ta lanta conociendo ordo y respet, pa nan mes, y pa otro hende. Esaki lo conduci na reduci grandemente e problema di criminalidad, falta di respet pa autoridad y falta di respet pa otro hende cu ta reina awor aki. Si nos inverti na cas, scolnan y duna organisacion cu un mucha ta forma parti di dje, educacion y guia di calidad, nos lo crea un generacion mas sabi, mas profesional y mas ambisioso. E generacion ey lo “jump start” bek nos economia cu profesionalnan capasita, cu ideanan nobo y cu e “drive” necesario pa hiba Aruba dilanti den e mundo competitivo cu nos ta forma parti di dje. Si nos siña nos muchanan e eticanan di trabao cu ta esential pa forma un profesional capacita (work ethics), nan lo bira e “workforce” di futuro cu ta wak e importancia di ta mas productivo na trabou, di ta comprometi na un calidad halto di prestacion na trabou, cu ta traha hunto cu e doño di trabou (y no contra di dje) pa hiba e negoshi dilanti y cu lo forma parti di companianan exitoso. Esaki tambe lo yuda nos economia bai dilanti cu stapnan grandi.
Si nos wak e importancia di laga muchanan participa den arte y deporta, nos lo crea un generacion nobo di muchanan cu ta creativo den tur aspecto, cu ta mas saludabel mentalmente y físicamente y cu ta mas competitivo den tur area di nan bida. Consecuentemente lo nos por wak atrobe un reduccion den problemanan cu adicion, mal comportacion, problemanan mental, criminalidad y problemanan di salud
Asina ki nos por keda menciona mas ehempel di con un voto pa traha riba e derechonan fundamental di un mucha ta un voto pa un mihor futuro pa nos tur. Nos lo no wak e frutanan di nos esfuersonan mes ora, nan no ta cosnan tangibel (no ta algo cu bo por wak manera un caminda nobo, un edificio nobo). Nos lo mester tin pasenshi y perseverancia. Pero mas y mas nos lo por mira e cambionan positivo den nos comunidad, cu tur e beneficionan akiriba menciona. E meta aki mester ta e prioridad di tur hende, no di gobierno so. Gobierno tey pa pone e leynan, structura y instancianan necesario, pero cada un di nos, si nos ta mayor di un mucha of no, tin e responsabilidad como parti di comunidad pa duna di nos parti pa cria un futuro generacion cu lo beneficia nos isla den tur sentido. Postulando mi mes riba lista di partido Pueblo Orguyoso y Respeta(POR), mi ta cla pa sigui haci di mi parti si bo dunami bo confiansa pa e proximo gobernacion.